507 total views
Hindi dapat manaig ang emosyon sa halip ay pairalin ang pagiging makatwiran at makatarungan sa lahat ng pagkakataon.
Ito ang payo ni Military Ordinariate of the Philippines Bishop Oscar Jaime Florencio sa mga kawani ng Pambansang Pulisya ng Pilipinas kasunod ng panibagong kaso ng pamamaril ng isang pulis sa isang 52-taong gulang na ginang sa Barangay Greater Fairview, Quezon City noong ika-31 ng Mayo, 2021.
Ayon sa Obispo, bagamat hindi maiiwasan na magkaroon ng galit o sama ng loob laban sa kapwa ay hindi naman dapat na hayaang manaig ang negatibong emosyon.
“Gusto kong sabihin lang sa mga pulis na huwag naman nating, alam ko mayroon tayong mga problema minsan hindi po natin mawawala yan dahil mga tao lamang tayo, ngunit huwag naman natin [ilabas] kung ano ang galit, kung ano ang sama ng loob because we are people who have also reasons, yun mga what is reasonable yun ang dapat guiding principle natin something that is reasonable hindi yung kung nanggagaling sa emosyon natin.”pahayag ni Bishop Florencio sa panayam sa Radio Veritas.
Ipinaliwanag ni Bishop Florencio na hindi dapat magpadala sa negatibong emosyon ang bawat isa sapagkat hindi na muling maitatama pa ang maling magawa.
Giit ng Obispo, hindi na muling maibabalik pa ang anumang masisira o buhay na mawawala dahil sa pagpapadala sa labis na emosyong nadarama.
“Siguro kung talagang nandoon ang galit, nandoon ang sama ng loob ay huwag lang kumilos kung ano pa man kasi minsan nadadala tayo sa ating emosyon so yun [karahasan] ang nangyayari, so that is irreversible kasi kung merong namamatay hindi mo naman mabubuhay yun, so yun ang payo ko sa inyo mga kapatid na mga kapulisan.” Dagdag pa ni Bishop Florencio.
Pagbabahagi pa ni Bishop Florencio, dapat na tuwinang isaisip ng bawat kawani ng pwersa ng pamahalaan ang kanilang mga pamilya at mga mahal sa buhay na maaring maapektuhan ng mga maling desisyon at pagpapadala sa emosyon na maaring mauwi sa karahasan.
Tiniyak naman ng Obispo ang pananalangin para sa paggabay ng Panginoon sa may higit 190,000 mga pulis sa buong bansa.
“At the end of the day may pamilya din kayo, at the end of the day may mga anak din kayo, at the end of the day may asawa so kung titingnan po natin ay talagang mahirap yan, nasira mo na ang pamilya mo, nasira na ang career mo, mayroon ka pang napatay, ganun ang tingnan natin. So anyway I’ll be praying for you also as part of my duty as PNP and AFP Military Ordinariate.” Pagtiyak ni Bishop Florencio.
