578 total reads
Paigtingin ang kamalayan sa tungkuling pangalagaan ang kalikasan.
Ito ang mensahe ni Manila Apostolic Administrator Bishop Broderick Pabillo kaugnay sa paggunita sa World Environment Day at Philippine Environment Month ngayong Hunyo.
Ayon kay Bishop Pabillo, na siya ring chairman ng Catholic Bishops’ Conference of the Philippines-Episcopal Commission on the Laity, katulad ng paksa ng pagdiriwang ngayong taon na “ecosystem restoration”, kinakailangan ngayon ng daigdig ang wastong pagmamalasakit at pangangalaga upang mapanumbalik ang sigla at kagandahan ng mga likas na yaman nito.
“Itong commemoration na ito’y paalala sa atin na ang ating tungkulin sa environment ay talagang mahalaga na… Tulad ngayon, ang paksa ay ‘ecosystem restoration,’ kailangan nating i-restore at pangalagaan ang kalikasan,” bahagi ng mensahe ni Bishop Pabillo sa panayam ng Radio Veritas.
Tinukoy naman ng Obispo na isang paalala sa bawat isa ang mga nagaganap sa kapaligiran upang magkaroon na ng pagbabago sa mga nakagawiang lubos na nakakaapekto sa ating kalikasan maging sa kalusugan ng bawat tao.
Isa sa mga pagbabagong ito ang panawagang ‘ecological conversion’ na higit na makatutulong upang unti-unting mapigilan ang tuluyang pagkasira ng kalikasan at daigdig
“Kaya ito po sana ‘yung paalala sa atin, ano kayang change of lifestyle ang magagawa natin para naman hindi lalong masira ang kalikasan? Ang isa pong palaging pinapanawagan sa’tin ay ecological conversion na hinihikayat na magbago na ang ating pagkilos sa ating buhay,” ayon sa Obispo.
Samantala, hinihikayat naman ni Bishop Pabillo na nawa’y sa gitna ng umiiral na pandemya ay maging ‘less consumeristic’ ang bawat isa.
Ito’y upang maiwasan ang pagsasayang at pagkonsumo sa mga hindi makabuluhang bagay na kalauna’y nagdudulot lamang ng suliranin sa wastong pagpapanatili sa ating nag-iisang tahanan.
“Ngayong panahon ng pandemic, hinihikayat po tayong maging less consumeristic. Hindi bili nang bili at tapon nang tapon, pagkatapos,” ayon kay Bishop Pabillo.
Kaugnay nito, sinabi ng Kanyang Kabanalan Francisco na kinakailangan ng bawat isa na mapanumbalik ang ekolohikal na balanse sa ating sarili, sa kapwa, sa kalikasan at sa iba pang buhay na nilalang, maging sa pagkakaroon ng balanse sa pananampalataya sa Poong Maykapal.
Unang inilunsad ang World Environment Day noong 1974 sa pangunguna ng United Nations upang ipalaganap ang kamalayan hinggil sa wastong pagkilos at pangangalaga sa kalikasan.
