665 total reads
Naniniwala ang kauna-unahang Obispo ng Apostolic Vicariate of Taytay, Palawan na higit pang lalalim at titibay ang ugnayan ng bikaryato at ng Metropolitan Archdiocese of Manila sa pagkakatalaga kay Bishop Broderick Pabillo bilang bagong Obispo ng Apostoliko Bikaryato ng Taytay.
Ayon kay Taytay Bishop Emeritus Edgardo Juanich, bukod sa Panginoon at sa Santo Papa Francisco ay marapat din pasalamatan at iba pang mga opisyal ng Simbahang Katolika na patuloy na gumagabay sa bikaryato kabilang na ang Kanyang Kabunyian Luis Antonio Cardinal Tagle na siyang Prefect of the Congregation for the Evangelization of Peoples na nangangasiwa sa kapakanan ng bikaryato mula sa Vatican.
Ipinaliwanag ng Obispo na bukod sa Propaganda Fide ay nasa ilalim rin ang Apostolic Vicariate of Taytay, Palawan sa pangangasiwa ng Metropolitan Archdiocese of Manila na matagal na pinaglingkuran ni Bishop Pabillo bilang Auxiliary Bishop sa loob ng 15-taon.
Ibinahagi ni Bishop Juanich na maituturing na isang biyaya si Bishop Pabillo sa biyaryato dahil sa kanyang mayamang karanasan at magandang relasyon sa Archdiocese of Manila mula sa pagiging katuwang na Obispo kay Cardinal Gaudencio Rosales, Cardinal Luis Antonio Tagle at kay Cardinal Jose Advincula.
“Pinapasalamatan po natin ang ating mga Cardinal, lalong lalo na ang Cardinal Chito [Luis Antonio Tagle] na in-charge on Evangelization of Peoples – Propaganda Fide na tayo ay sakop at gayundin po ang totoo niyan tayo ay sakop din po ng Metropolitan Archdiocese of Manila para bang yung atin pong link doon sa Archdiocese of Manila ay lalo pang tumingkad at tumibay mga kapatid sa pagdating po ng 15 years na Auxiliary Bishop ng Manila at napakaganda na simula ng lenght ng paglilingkod niya sa Manila simula kay Cardinal Gaudencio Rosales, Cardinal Chito hanggang dumating si Cardinal [Jose] Advincula, 15 years po.” Ang bahagi ng pahayag ni Taytay Bishop Emeritus Edgardo Juanich.
Binigyang diin naman ni Bishop Juanich na dapat na tuwinang maging bukas ang puso ng bawat isa sa bikaryato para sa biyaya ng Panginoon tulad na lamang ng Mahal na Birheng Maria na sa kabila ng mga pagsubok, hamon at kawalan ng katiyakan ay hindi nawalan ng pag-asa at pananampalataya sa hatid na biyaya ng Panginoon sa kanyang buhay.
“Talagang nakakatuwa ito’y himala ng Panginoon, himala ng Panginoon at punong puno ang ating puso tayo ay patuloy lamang na maging open kagaya ni Mama Mary para ang grasya ng Panginoon ay dumaloy sa atin, lahat ng mga gawain, hirap, mga challenges sa ating mga komunidad sa ating mga parokya, pati na sa ating mga relasyon yan ay sabihin na natin mga ingredient [sa buhay pananampalataya].” Dagdag pa ni Bishop Juanich.
Itinatatag ang Apostolic Vicariate of Taytay, Palawan noong May 13, 2002 kung saan nagsilbing kauna-unahang Obispo ng bikaryato si Bishop Edgardo Juanich hanggang sa magretiro noong November 14, 2018.
Sa loob ng halos tatlong taon ay naging sede vacante ang Apostolic Vicariate of Taytay, Palawan na pansamantalang pinangasiwaan bilang Administrator ni Fr. Reynante Aguanta bago hinirang si Bishop Broderick Pabillo bilang ikalawang Obispo ng bikaryato na nagsilbi namang Auxiliary Bishop o katuwang na obispo sa Arkidiyosesis ng Maynila sa loob ng 15-taon mula noong Mayo 24, 2006.
