666 total reads
Nagpaabot ng panalangin si Gumaca Bishop Victor Ocampo para sa mga health workers na humaharap sa iba’t ibang pagsubok dulot ng coronavirus pandemic.
Ipinagdarasal ni Bishop Ocampo na nawa’y patuloy na magkaroon nang lakas ng loob ang mga healthcare workers sa kabila ng mga usapin hinggil sa hindi maayos na pamamahagi ng benepisyo bilang kapalit ng kanilang pagsasakripisyo magmula nang lumaganap sa bansa ang pandemya.
“Nauunawaan po namin ang kanilang kalagayan na lubos na nanghihina ngayong tumataas ang bilang ng mga impeksyon ng COVID at kabawasan naman ng mga nurses na lilipat sa iba’t ibang gawain. Napilitan silang magtrabaho ng mas mahabang oras kaysa sa nararapat habang lalong nalalagay sila mismo sa panganib ng pagkahawa sa kanilang inaalagaan,” bahagi ng panalangin ni Bishop Ocampo mula sa panayam ng Radio Veritas.
Hinihiling din ng Obispo na patuloy nawang gawaran ng Panginoon ang mga medical workers nang maayos na kalusugan at pangangatawan.
“Hinihingi po namin na palakasin ang kanilang pangangatawan at kalooban upang ipagpatuloy nila ang gawain ng mabuting samaritano na humarap sa panganib at pagtupad ng makataong pagtulong sa biktima,” ayon kay Bishop Ocampo.
Batay sa tala ng Private Hospitals Association of the Philippines (PHAPi), 40-porsyento ng mga medical workers mula sa mga pribadong ospital ang nagbitiw noong nakaraang taon, ngunit mas marami pa ang mga sumunod kasabay ng panibagong pagtaas ng mga kaso ng COVID-19 ngayong taon.
Samantala, ipinag-utos na ni Pangulong Rodrigo Duterte sa Department of Health na madaliin ang pamamahagi ng benepisyo para sa mga frontline health workers.
Kaugnay ito sa mga reklamo ng ilang grupo ng medical workers mula sa mga pribadong ospital na hindi pa rin natatanggap ang ipinangakong special risk allowance (SRA) at ang pag-alis sa iba pang benepisyo sa gitna ng umiiral na pandemya.
Nito lamang Hunyo nang kasalakuyang taon, nilagdaan ni Pangulong Duterte ang Administrative Order 42 na nagsasaad ng paggawad ng SRA na nagkakahalaga ng P5,000 kada buwan para sa mga pribado at pampublikong health workers na direktang lantad sa mga pasyenteng mayroong COVID-19.
