615 total views
Nasasaad sa Canon Law o sa batas ng Simbahan ang pambihirang tungkuling dapat na gampanan ng mga layko bilang tagapagpalaganap ng liwanag ni Hesus sa sanlibutan.
Ito ang binigyang diin ni Taytay Bishop Broderick Pabillo – Chairman ng CBCP-Episcopal Commission on the Laity sa naganap na ‘Responsible Christian Citizenship’ Webinar na inorganisa ng Couples for Christ.
Ayon sa Obispo na siya ring Spiritual Adviser ng Couples for Christ, bahagi ng tungkulin ng mga binyagan na dalhin ang liwanag at mga turo ni Kristo sa lahat ng aspekto ng kanilang buhay bilang tunay na saksi salita ng Diyos.
“Nakalagay din sa Canon Law, yang Canon Law yan ang batas ng Simbahan ang Canon225 Paragraph 2 na ‘Lay people have, according to each one’s own condition, they are also bound by a particular duty to imbue and perfect the order of temporal affairs with the spirit of the gospel and thus to give witness to Christ, especially in carrying out these same affairs and in exercising secular functions.’ Inuulit uli sa batas ng Simbahan ang special na tungkulin ng mga lay faithful na dalhin ang liwanag ni Kristo kung nasaan sila sa kanilang secular business, sa kanilang mga gawain.”pahayag Bishop Pabillo.
Ibinahagi ng Obispo na ang mga layko ang naatasan sa pambihirang tungkulin na aktuwal at ganap na ibahagi ang mga Salita ng Diyos sa lipunan dahil sa pagiging lantad sa ‘secular world’.
Paliwanag ni Bishop Pabillo, “Kasi sila ang engaged sa secular world, sa temporal sphere ang kanila ng trabaho ay nasa pabrika, nasa opisina, nasa schools, nasa business, sila yung nasa pulitika, sila yung nasa pamilya kaya dooon dapat nila dalhin ang Mabuting Balita kung nasaan sila kaya yan yung special obligation of the lay faithful, kaya sila ay Kristiyano hindi lang sa loob ng Simbahan, hindi lang kapag sila ay gumagawa ng mala-Simbahang gawain ngunit sa kanilang pang-araw-araw na gawain sila ay Kristiyano rin at dalhin nila ang pananampalataya kay Kristo sa mga gawaing ito so yan po yung hinihiling sa atin.”
Layunin ng ‘Responsible Christian Citizenship’ Webinar na inorganisa ng Couples for Christ na higit na mamulat ang kamalayan ng bawat mamamayan na kaakibat ng pagiging isang mabuting Kristiyano’t Katoliko ang pagiging isang mabuting miyembro ng komunidad na mayroong paninindigan para sa ikabubuti ng mas nakararami.
Ang naganap na talakayan ay bahagi rin ng paghahanda ng organisasyon para sa nakatakdang halalan sa susunod na taon kung saan una na ding binigyang diin ni Bishop Pabillo ang dapat na matalino at maka-Diyos na pakikilahok sa halalan ng bawat mamamayang Pilipino o pagpapairal ng One Godly Vote para sa kinabukasan ng bansa.
