612 total reads
Nagpaabot ng pagbati ang European Union (EU) sa pagkakaroon ng kauna-unang Nobel Peace Prize winner ng Pilipinas sa katauhan ni Maria Ressa na isang kilalang Filipina journalist.
Ayon sa pamunuan ng European Union (EU) naaangkop lamang ang pagkilala ng prestihiyosong Nobel Peace Prize mula sa Norway kay Ressa at Dmitry Muratov ng Russia na kapwa nanindigan para sa pagsusulong at pagbabantay ng “freedom of expression” sa Pilipinas at sa Russia.
Pagbabahagi ng EU mahalaga ang paninindigan at pagbibigay proteksyon sa “freedom of expression” na isang mahalagang salik para sa pagkakaroon ng ganap na demokrasya at kapayapaan hindi lamang sa bawat bansa kundi sa buong daigdig.
“The European Union welcomes the decision to award the Nobel Peace Prize to Maria Ressa and Dmitry Muratov for their efforts to safeguard freedom of expression and congratulate them wholeheartedly. We fully subscribe to the Nobel Committee’s acknowledgment that freedom of expression is a precondition for democracy and lasting peace worldwide,” ang bahagi ng opisyal na pahayag ng European Union (EU).
Partikular namang binigyang pagkilala ng European Union (EU) ang determinasyon at pagpupursige ni Ressa na maisulong ang katotohanan at kalayaan sa Pilipinas sa pamamagitan ng independent journalism sa kabila ng anumang banta ng paniniil sa kanyang kalayaan bilang isang mamamahayag.
Paliwanag ng EU, ang paninindigan at dedikasyon ni Ressa sa kanyang tungkulin bilang mamamahayag ay maituturing na isang halimbawa at binhi ng pag-asa hindi lamang para sa Pilipinas o sa Timog-Silangang Asya kundi maging sa buong daigdig.
“Maria Ressa has not shied away to demonstrate her commitment to facts as the basis for truth and trust in a democracy. Her dedication to journalism, in the face of numerous ongoing legal actions and her conviction, is an inspiration to all who believe in the importance of free and independent journalism. Her work offers hope not only to the people in the Philippines, but across South-East Asia and the world,” dagdag pa ng European Union.
Si Ressa na dating CNN bureau chief at isa sa mga nagtatag ng online news site na Rappler ay naharap sa iba’t ibang mga kaso na hinihinalang may kaugnayan sa pagiging kilalang kritiko nito sa administrasyong Duterte.
Ang prestihiyosong Nobel Peace Prize ay mayroon ring kalakip na gold medal at cash prize na 10 million Swedish kronor na katumbas ng mahigit sa $1.44 milyon dolyar.
Nagmula ang prize money sa pamana na iniwan ni Swedish inventor Alfred Nobel na siyang ng nagtatag sa prestihiyosong Nobel Peace Prize na namatay noong 1896.
