Mahalaga ang gampanin ng mga katutubo sa pangangalaga at pagpapanatili sa ating nag-iisang tahanan.
Ito ang sinabi ni environmentalist priest Fr. Pedro “Pete” Montallana, OFM ngayong ginugunita ang Indigenous People’s Sunday bilang pagkilala sa mahalagang misyon ng mga katutubo sa pangangalaga sa kalikasan.
Ayon kay Fr, Montallana, chairman ng Save Sierra Madre Network Alliance na dahil sa simpleng pamumuhay at pagmamalasakit ng mga katutubo, ang mga kabundukan at kagubatan ay patuloy na yumayabong at nagbibigay ng natural na tahanan sa iba’t ibang nilalang ng Diyos.
“Ang katutubo ay mahalagang factor para maiwasan natin ang lubusang pagkasira ng daigdig. Kasi alam n’yo kung wala ‘yung katutubo, sana ‘yung mga gubat natin ay wala na. It’s because of their simple lifestyle na panawagan din ni Pope Francis at saka yung kanilang paggalang sa kalikasan,” bahagi ng pahayag ni Fr. Montallana sa panayam ng Radio Veritas.
Iginiit naman ng makakalikasang pari na ang nangungunang sanhi ng pagkapinsala ng mga kabundukan at kagubatan ay dahil sa pagnanais ng mga tao na pagkakitaaan ito kahit lingid sa kaalamang lubos na maaapektuhan nito ang kalikasan lalo na ang mga katutubong naninirahan dito.
“Actually ‘yung ating mga forest have remained a same forest in many parts of the country because of their (Indigenous People) world view na ang kalikasan ay kapatid nila, nanay nila. They have lost that and many of the low landers have destroyed the forest kasi ang nakikita lang natin sa forest ay pera,” ayon sa pari.
Samantala, hinihiling naman ni Fr. Montallana ang pakikiisa ng bawat mamamayan sa makakalikasang hangarin ng mga katutubong upang patuloy na mapangalagaan ang ating inang kalikasan.
Gayundin ang ipanalangin ang mga ito para sa patuloy na katatagan at kaligtasan laban sa mga hinaharap na panganib dulot ng pang-uusig at pagpapalayas mula sa kanilang mga lupaing minana dahil sa masama at nakapipinsalang hangarin ng pag-unlad.
“It’s very important now [na] ipagtanggol natin ang mga katutubo, especially sa kanilang mga hinaharap na development aggression during our time. I think it’s really a warning bell ng Diyos sa atin that we take care of the katutubo na kanyang binigyan ng special charism na alagaan ang kalikasan. Sana po ay ipagdasal natin at sikapin natin na gawin natin ang lahat upang maprotektahan natin ang mga katutubo dito sa ating lugar, sa buong bansa at sa buong mundo,” saad ni Fr. Montallana.
Batay sa tala ng National Commission on Indigenous Peoples, tinatayang aabot sa mahigit 11.3-milyon ang kabuuang populasyon ng mga katutubo sa Pilipinas.
Nasasaad naman sa Laudato Si ni Pope Francis na ikinalulungkot nito ang sapilitang pagpapaalis sa mga katutubo mula sa kanilang mga lupaing ninuno upang magsagawa ng pagmimina ang mga makapangyarihang kumpanya at abusuhin ang iba pang likas na yaman ng kanilang lupain.
