527 total reads
Nagpahayag ng pakikiisa Catholic Bishops’ Conference of the Philippines (CBCP) sa pandaigdigang panawagan para sa pagbuwag ng parusang kamatayan sa buong daigdig.
Ito ang ibinahagi ni Diocese of Legazpi Bishop Joel Baylon, chairman ng CBCP-Episcopal Commission on Prison Pastoral Care(CBCP-ECPPC) kaugnay sa paggunita ng World Day Against the Death Penalty.
“The Catholic Bishops’ Conference of the Philippines-Episcopal Commission on Prison Pastoral Care (CBCP-ECPPC) joins in the worldwide celebration of the World Day Against the Death Penalty and reiterates its strong opposition to capital punishment and calls for its abolition worldwide.” Ang bahagi ng pahayag ni Legazpi Bishop Joel Baylon.
Ayon sa Obispo, bukod sa isang tahasang paglabag sa dignidad at buhay ng isang indibidwal ang parusahang kamatayan ay hindi rin kailanman napatunayan na ito ay solusyon sa kriminalidad sa lipunan.
Paliwanag pa ni Bishop Baylon, maituturing din na anti-poor ang parusang kamatayan lalo na dahil sa kawalan ng kakayahan at kapasidad ng mga mahihirap na kumuha ng abogado upang maipagtanggol ang kanilang kaso sa harapan ng hukuman.
Pagbabahagi ng Obispo, hindi naaangkop ang pagkakaroon ng parusang kamatayan lalo na sa isang bansa na hindi maayos o patas ang justice system tulad ng sa Pilipinas sapagkat hindi na muling mababawi pa ang pagkitil sa buhay ng sinumang inosenteng napatawan ng parusang kamatayan.
Giit ni Bishop Baylon, ang tunay katurangan ay hindi dapat na mapaghiganti at mapagparusa sa halip ay dapat na mapagpatawad at nagsusulong ng ganap na pagsisisi at pagbabagong buhay.
“We join the worldwide clamor for the abolition of the death penalty worldwide. Let us instead work together towards the kind of justice that heals and restores the dignity of every human person.” Dagdag pa ni Bishop Baylon.
Batay sa datos ng World Coalition Against the Death Penalty, umaabot na sa 107-bansa ang nagbuwag ng parusang kamatayan kabilang na ang Pilipinas noong 2006 sa ilalim ng Administrasyong Arroyo.
Kaugnay nito nasasaad sa opisyal na pahayag ng kumisyon ang panawagan sa mas dapat na higit tutukan ng pamahalaan upang masolusyunan ang kriminalidad sa lipunan at maisaayos ang sistema ng katarungan sa bansa.
