594 total views
Iginiit ni Apostolic Vicariate of Bontoc-Lagawe Bishop Valentin Dimoc na magkaakibat at magkahalintulad ang pagkilala sa karapatan ng mga katutubo at kalikasan.
Ayon kay Bishop Dimoc, Chairman ng Catholic Bishops Conference of the Philippines – Episcopal Commission on Indigenous Peoples, ang pagpapakita ng paggalang sa karapatan ng mga katutubo ay pagtataguyod din sa karapatan ng ating nag-iisang tahanan.
“When you respect and defend the rights of the indigenous people, you also protect the integrity of the environment. When you respect and promote the rights of nature, you also uphold the rights of indigenous people,” pahayag ni Bishop Dimoc sa panayam ng Radio Veritas.
Sinabi ni Bishop Dimoc na ang paggunita rin sa Indigenous Peoples’ Sunday ay pagkilala sa mahahalagang gampanin at misyon ng mga katutubong Pilipino hinggil sa pangangalaga at pagpapanatili sa mga kagubatan at iba pang likas na yaman ng bansa.
Ito rin ang dahilan kung kaya’t makabuluhan ang pagtatapos ng Season of Creation dahil sa paglalaan ng araw para sa mga katutubong unang naatasan ng Diyos upang maging mabubuting katiwala ng ating inang kalikasan.
“The Indigenous Peoples’ Sunday is a celebration that highlights the life of the Indigenous People and concludes the Season of Creation which started on September 1… This is what it means to celebrate the Season of Creation and conclude it with the Indigenous Peoples’ Sunday,” saad ni Bishop Dimoc.
Sa tala ng National Commission on Indigenous Peoples, tinatayang aabot sa mahigit 11.3-milyon ang kabuuang populasyon ng mga katutubo sa Pilipinas.
Naitala rin na aabot na sa 71 indigenous leaders ang napaslang sa mga nakalipas na taon sanhi ng pang-uusig at pagpapaalis mula sa kanilang mga lupaing ninuno upang makapagsagawa ng mga pagmimina at plantasyon ang mga makapangyarihang kumpanya na nakapipinsala naman sa kalikasan.
Ang mga pangyayaring ito ay sumasalamin sa paglabag sa batas, partikular na sa Indigenous Peoples’ Rights Act of 1997 na dapat sana’y mangangalaga sa karapatan ng mga katutubo.
