534 total reads
Inaanyayahan ng Kanyang Kabunyian Luis Antonio Cardinal Tagle – Prefect of the Congregation for the Evangelization of Peoples ang bawat isa na magkaroon ng pagsusuri sa sarili hindi lamang bilang indibidwal kundi bilang isang pamilya at komunidad.
Sa pagninilay ng Cardinal sa Banal na Misa sa Pontificio Collegio Filippino, binigyang-diin nito na mahalaga ang pagsusuri sa sarili upang ganap na maunawaan kung ano ang dapat bigyang prayoridad upang makarating sa nais na patutunguhan.
Ioinaliwanag ni Cardinal Tagle ang pagkakaroon ng magulong prayoridad ay isang dahilan upang mawala sa direksyon sa buhay ang isang indibidwal.
“Let us again engage in some sort of examination of self as individuals, as families, and as communities. Do we know where we are going and because we know where we are going, where we want to go, we set our priorities, we know what is important and what is not important. Kapag magkagulo-gulo na yung kung ano ba ang mahalaga o hindi mahalaga palatandaan yan na hindi alam nung tao kung saan siya pupunta o kung ano ang gusto niyang puntahan,” pagninilay ni Cardinal Tagle.
Tinukoy ni Cardinal Tagle ang mga lingkod bayan na mas higit na binibigyang prayoridad ang pansariling interes sa salapi at kapangyarihan na kaya nanaig ang katiwalian sa pamahalaan.
Pinuna rin ng Cardinal ang mga mag-aaral na sa halip na gamitin sa pag-aaral ang makabagong teknolohiya tulad ng mga gadget at internet ay ginagamit lamang ito sa paglalaro na nagdudulot ng pagkawala ng prayoridad ng mga ito sa pag-aaral.
“Minsan ang hinihingi natin o kinukuha natin wala naman talagang masyadong kinalaman doon sa direksyon sa buhay. You are a public servant that’s your goal so look for wisdom to govern not to use the position for riches, that’s not governance that’s corruption. You are a student, your goal is to study, you’ve been given a computer to help you study not to spend the whole day and night with video games, you will lose your way,” dagdag pa ni Cardinal Tagle.
Iginiit ng Cardinal na hindi dapat balewalain ng sinuman ang Salita ng Diyos sapagkat sa pamamagitan nito ay higit na mauunawaan ang plano ng Panginoon para sa buhay ng bawat isa.
“Huwag nating babalewalain ang Salita ng Diyos kung gusto nating makilala ang ating sarili, ang Salita ng Diyos ang magpapakilala sa atin kung pakikinggan natin at tatanggapin natin ng taus sa puso ang Salita ng Diyos mas makikilala natin ang ating sarili at ibabalik tayo ng Salita ng Diyos sa ating tunay na direksyon,” ayon pa kay Cardinal Tagle.
