514 total reads
Binigyang-diin ni Puerto Princesa Palawan Bishop Socrates Mesiona ang kahalagahan ng pakikilahok ng mananampalataya sa isasagawang konsultasyon para sa Synod of Bishops on Synodality.
Ito ang paanyaya ng Obispo sa nakatakdang pagsisimula ng diocesan phase ng sinodo sa Pilipinas sa October 17.
Sinabi nitong higit kinakailangan ang pagbubuklod ng mamamayan tungo sa mas maunlad na Simbahan.
“Ang sama-sama nating paglalakbay ay magkakaroon ng konkretong laman sa pamamagitan ng malawakang konsultasyon na gagawin sa bawat parokya ng ating bikaryato na dapat lahukan ng iba’t ibang sektor ng Simbahan; kaya hinihiling ko po sainyo na makiisa, makilahok sa ating sama-samang paglalakbay bilang isang Simbahan,” bahagi ng paanyaya ni Bishop Mesiona.
Ang ika-16 ng Synod of Bishops na gaganapin sa October 2023 ay hinati ni Pope Francis sa tatlong bahagi ang diocesan phase, continental at universal kung saan pormal itong sinimulan noong October 10 sa paglunsad ng Santo Papa sa Vatican.
Layunin ng paghahati sa tatlong bahagi na bukod sa mga obispo ay makalalahok rin ang mga pari, religious communities at higit sa lahat ang mga layko na bumubuo sa malaking bahagdan ng simbahang katolika sa pagbalangkas ng mga dokumentong imumungkahi sa Santo Papa at tatalakayin sa pagpupulong ng mga pinunong pastol.
Paliwanag pa ni Bishop Mesiona na sa diocesan phase ng sinodo ay hinikayat ang bawat isa na maging bahagi sa paglalakbay, pagdarasal at pakikinig sa isa’t isa sa gabay ng Banal na Espiritu.
Tema ng sinodong ito ang ‘For a Synodal Church: Communion, Participation, Mission’ kung saan binigyang diin ang sama-samang paglalakbay bilang isang Simbahan.
Inaasahang makapagbalangkas ng preparatory document ang bawat diyosesis na isusumite sa Synod Office sa Vatican sa Abril 2022 bilang paghahanda sa universal Synod of Bishops sa 2023.
