653 total reads
Nagpasalamat ang Diyosesis ng Tagbilaran sa pamunuan ng Minor Basilica of the Black Nazarene sa pangunguna ni Msgr. Hernando Coronel sa kaloob na replica image ng Mahal na Poong Nazareno.
Ayon kay Tagbilaran Bishop Alberto Uy, makabuluhan ang kaloob na imahe ng Poong Nazareno upang maipalaganap ang debosyon sa Panginoong Hesus sa diyosesis na nagdiwang ng ikawalong dekada mula nang maitatag.
“So grateful to Quiapo Church (Shrine of the Black Nazarene) for giving us a replica image of Poong Nazareno. This is a priceless gift received by the Diocese of Tagbilaran on the occassion of its 80th Foundation Anniversary,” bahagi ng pahayag ni Bishop Uy.
Dumating sa Bohol ang imahe ng Poong Nazareno noong November 20 kung saan sinalubong ito ng ilang pari at mananampalataya ng diyosesis at nagsagawa ng motorcade mula paliparan hanggang sa St. Joseph Cathedral Shrine and Parish sa Tagbilaran City at isinagawa ang pagbabasbas at acceptance ng poon sa pangunguna ni Bishop Uy.
Bahagi rin ito ng pagpapalawak ng Quiapo Church ng debosyon sa Poong Nazareno lalo’t ipinagdiriwang ng bansa ang 500 Years of Christianity.
Kaugnay nito, patuloy naman ang paghahanda ng basilica sa nalalapit na Traslacion 2022 sa Enero na inaasahang ipapatupad pa rin ang limitadong pagdiriwang ng pista dahil sa pandemya.
Dahil dito, bibisita ang imahe ng Poong Nazareno sa mga lugar ng North at South Luzon, National Capital Region at multi-sectoral organizations sa Kamaynilaan upang maiwasang dumagsa ang mga deboto sa simbahan ng Quiapo sa araw ng Pista.
Bukod sa Diyosesis ng Tagbilaran, aktibo rin ang debosyon sa Poong Nazareno sa Cagayan De Oro at ilang lugar sa Mindanao.
Pansamantalang inilagak ang replica image ng Poong Nazareno sa Our Lady of Assumption Parish sa Dauis Bohol habang tinatapos ipinagawang Shrine na inilaan ng diyosesis sa poon.
Nagbahagi naman ng ilang panayam sina Fr. Danichi Hui at Fr. Earl Allyson Valdez pawang parochial vicar ng Quiapo Chruch sa mananampalataya ng Tagbilaran kaugnay sa debosyon ng Mahal na Poong Nazareno.
