529 total views
Hindi na saklaw ng COVID-19 vaccine indemnification fund ang mga makakaranas ng adverse reaction kapag ang bakuna ay mayroon nang full authorization mula sa Philippine Food and Drug Administration (FDA).
Ang indemnification fund na nagkakahalaga ng P500-milyon ay ang pondong inilaan ng pamahalaan para sa mga indibidwal na naospital o nasawi dahil sa epekto ng COVID-19 vaccine.
“Kapag mayroon nang full [authorization] ang bakuna at ika’y nagkaroon ng side effects, sagutin mo na ‘yon. Hindi na ‘yan sagutin ng gobyerno at ng drug company kasi may full approval na [ang bakuna] na safe ‘yung produkto,” pahayag ni health reform advocate Dr. Tony Leachon sa panayam sa Veritas Pilipinas.
Ipinaliwanag ni Leachon, dating special adviser ng National Task Force Against COVID-19 na kapag ginawaran na ng full authorization ang COVID-19 vaccine ay pasado ito na ligtas at epektibong panglunas laban sa virus.
Sa kasalukuyan, EUA pa lamang ang iginagawad ng FDA sa siyam na COVID-19 vaccine brand, kabilang ang Pfizer, AstraZeneca, Sinovac, Sputnik V, Janssen, Covaxin, Moderna, Sinopharm, at Covovax.
nito lamang Agosto ay nakatanggap na ng full approval mula sa United States FDA ang Pfizer BioNTech vaccine na pinangalanan na ngayon sa merkado bilang Comirnaty.
Inaasahan naman ng Philippine FDA na sa unang bahagi ng 2022 ay magkakaroon na rin ng full authorization ang COVID-19 vaccine sa bansa.
