410 total views
Hinihikayat ng healthcare ministry ng Catholic Bishops’ Conference of the Philippines ang bawat isa na bigyan ng sapat na atensyon at oras ang mga taong nakakaranas ng mental health problems.
Ito ang panawagan ni Camillian priest Father Dan Cancino, executive secretary ng CBCP-Episcopal Commission on Health Care sa patuloy na pagdami ng mga nakakaranas ng depresyon at iba pang suliraning pangkaisipan dahil COVID-19 pandemic.
“Kasi ang mga taong nakakaranas ng depression at anxiety kapag tatanungin mo ng ‘kumusta ka na?’, usually, ang sagot nila ‘okay lang’. Pero deep within, ang paa nila ay hindi nakalapat sa lupa,” bahagi ng pahayag ni Fr. Cancino sa Radio Veritas.
Sinabi ni Fr. Cancino na ilan sa mga maaaring gawin upang makatulong sa mga nakakaranas ng depresyon ay ang pagbibigay ng oras upang magmasid at makinig.
Ipinaliwanag ng pari na ito’y para mas madaling matulungan at madamayan ang kapwa.
“Tingnan natin ang mga behaviors pati ‘yung feelings nila. Mag-reachout tayo to assure them na nandun tayo at sasamahan natin sila. Pakinggan din natin sila kasi ang mental health is about listening “ saad ng pari.
Batay sa datos ng Department of Health – National Mental Health Program, aabot sa mahigit isang milyong indibidwal sa bansa ang nakakaranas ng depressive disorder.
Naitala din dito na mahigit sa 500-libo ang mayroong bipolar disorder at 200-libo naman ang nagsasabing mayroong schizophrenia.
Ayon naman sa National Center for Mental Health, umabot sa 1,375 suicide-related calls ang natanggap ng institusyon noong 2021.
Habang ayon naman sa Philippine Statistics Authority na noong 2020, hindi bababa sa higit 4,000 katao sa bansa ang namatay bunsod ng pagpapatiwakal.
