Umaasa ang opisyal ng Catholic Bishops’ Conference of the Philippines na matugunan ng mga susunod na lider ng bansa ang suliraning kinakaharap ng mga katutubo.
Ayon kay Bontoc-Lagawe Bishop Valentin Dimoc, chairman ng CBCP-Episcopal Commission on Indigenous Peoples, dapat na mabigyang-pansin ang mga katutubo lalo na sa usapin ng pagpapaunlad kung saan maaapektuhan ang kanilang komunidad.
Ito ang pahayag ng obispo kaugnay sa kinakaharap na suliranin ng mga katutubong Dumagat-Remontado na apektado ng mega-billion Kaliwa Dam project.
“Hoping that the next national leaders will investigate what [National Commission on Indigenous Peoples] had done to manipulate the outcome,” pahayag ni Bishop Dimoc sa Radio Veritas.
Matatandaang nitong January 28 ay nilagdaan na ang Memorandum of Agreement para sa proyekto sa pagitan ng mga katutubo at Metropolitan Waterworks and Sewerage System at NCIP, subalit hindi dumaan sa wastong proseso at pagpapaliwanag sa mga katutubo.
Mariing kinundena ng mga Dumagat-Remontado ang tila pagmanipula ng pamahalaan sa desisyon.
Iginiit naman ni Bishop Dimoc na isama rin sa mga layunin ng mga susunod na pinuno ng bansa ang pagrebisa at pagpapatibay sa free, prior and informed consent (FPIC) para sa mga katutubo.
Ito’y upang mas mapangalagaan ang karapatan ng bawat katutubo sa anumang desisyon o proyekto na makakaapekto sa kanilang pinakakaingatang yaman at lupain.
“The only hope as of now is the next set of national leaders to have the FPIC process be reviewed,” saad ni Bishop Dimoc.
Nauna nang nanawagan si Father Pete Montallana, OFM, chairperson ng Save Sierra Madre Network Alliance (SSMNA) sa mga kakandidato para sa 2022 National and Local Elections na manindigan laban sa pagtatayo sa Kaliwa Dam.
Ang proyekto ay bahagi ng New Centennial Water Source program ng pamahalaan na nagkakahalaga ng P12-bilyon at sinasabing makakatulong upang mabawasan ang kakulangan sa supply ng tubig sa Metro Manila.
Kung ito’y magpapatuloy, maaapektuhan ng proyekto ang aabot sa humigit-kumulang 11-libong pamilyang naninirahan sa 28-libong ektaryang lupain at halos 300-ektaryang kagubatan ng Sierra Madre.
