711 total views
Hinimok ni Balanga, Bataan Bishop Ruperto Santos ang mga kandidato para sa nalalapit na 2022 National and Local Elections na patuloy na isama sa mga plataporma at programa ang pangangalaga sa inang kalikasan.
Ayon kay Bishop Santos, Central Luzon Regional Representative ng Catholic Bishops’ Conference of the Philippines (CBCP), dapat na isulong ng sinumang mahahalal na lider ng bayan ang pamumuhunan para sa renewable energy na tiyak na mura, malinis, at ligtas para sa kapaligiran lalo na sa kalusugan ng mga tao.
Ito’y sa kabila ng pagsusulong sa nuclear energy na kamakailan lamang ay nilagdaan ni Pangulong Rodrigo Duterte ang Executive Order No. 164 o ang pagpapatibay sa tungkulin ng bansa para sa nuclear energy program.
“As for our political candidates, make your advocacies to make use of renewable energy. No to nuclear power plant,” pahayag ni Bishop Santos sa Radio Veritas.
Ang mga presidential candidates na sang-ayon sa pagsusulong ng renewable energy ay sina Ka Leody de Guzman, Vice president Leni Robredo, at Manila City Mayor Isko Moreno.
Suportado naman nina former Senator Bongbong Marcos, at Senator Ping Lacson ang nuclear energy.
Matagal nang nananawagan sa pamahalaan ang iba’t ibang makakalikasang grupo laban sa muling pagbuhay sa Bataan Nuclear Power Plant dahil sa panganib na maaaring idulot nito sa kalikasan at kalusugan ng tao.
Ang lalawigan ng Bataan ang tahanan ng BNPP na ipinagawa sa ilalim ng Administrasyon ni Pangulong Ferdinand Marcos noong 1972 at natapos noong 1984.
Nagkakahalaga ito ng $2B na hindi rin nagamit matapos ng EDSA People Power Revolution noong 1986.
Sa pag-aaral ng Department of Energy (DOE), National Power Corporation (NAPOCOR) at Korean Electric Power Company (KEPCO) na aabot sa isang bilyong dolyar ang magagastos ng pamahalaan sa loob ng apat na taon para sa muling pagbuhay sa 631-megawatt BNPP.
