Umapela sa mananampalataya ang kura paroko ng Sta. Rita de Cascia Parish sa Quezon City na higit na palalimin ang pagtitiwala sa Panginoon.
Sa panayam ng Radio Veritas kay Fr. Alfredo Pascual Jr. binigyang diin na ang maalab na pananampalataya sa Diyos ay makatutulong upang malampasan ng tao ang mga hamong kinakaharap.
Ayon sa pari, sa tulong ni Sta. Rita de Cascia ay higit mailapit ng tao ang mga kahilingan sa pamamagitan ng santa.
“Magtiwala tayo kay Sta. Rita de Cascia, manampalataya sa Panginoon at maniwalang hindi tayo pababayaan ng Diyos sapagkat ang pananampalataya ay mahalagang sangkap ng ating buhay, ito ang ating expression sa pagkapit sa Diyos,” pahayag ni Fr. Pascual sa Radio Veritas.
Pinangunahan ni Cubao Bishop Honesto Ongtioco ang misa ganap na alas-10 ng umaga kasama si Fr. Pascual at ilang mga pari ng diyosesis.
Sa homiliya ng obispo ibinahagi ang buhay ni Sta. Rita de Cascia na sa gitna ng hamon at kahirapang dinaranas ay natuklasan ang daan tungo kay Hesus.
“In life it’s important to have the right direction to Jesus; tulad ni Sta. Rita de Cascia natuklasan niya ang tunay na daan tungo sa isang buhay na ganap at malaya,” bahagi ng pagninilay ni Bishop Ongtioco.
Inaanyayahan din ni Fr. Pascual ang mananampalataya na hingin ang pamamagitan ni Sta. Rita sapagkat ito ang patron ng mga imposibleng bagay.
“Dumulog tayo kay Sta. Rita de Cascia dahil siya ay patron ng impossible cases, dinudulog niya ang kanyang mga panalangin sa Panginoon kasama ang mga paghihirap natin,” dagdag ni Fr. Pascual.
Tema sa pagdiriwang ng ika-65 kapistahan ng parokya ang ‘Sta. Rita Kaagapay tungo kay Kristo’ kung saan ayon kay Fr. Pascual isang magandang ehemplo sa mamamayan ang mga halimbawa ng patron sa pagiging masigasig sa kanyang pananampalataya sa Diyos.
Naniniwala ang pari na diringgin ng Panginoon ang kahilingang idinudulog ng mamamayan sa pamamagitan ni Sta. Rita lalo na sa pagpapalago ng pananampalataya.
“Hindi tayo bibiguin ng Panginoon lalo na kung ito’y sa ikabubuti ng ating pananampalataya at magpapalago ng ating sprituality,” dagdag ni Fr. Pascual.
