377 total views
Tiniyak ng European Union (EU) ang patuloy na pakikiisa sa Pilipinas lalo na sa pagpapaigting ng kamalayan sa pangangalaga ng kalikasan.
Sa pahayag ni European Union Ambassador to the Philippines Luc Véron sa pagbubukas ng ‘Euro-Pinoy Visual Arts Exhibition’, binigyan diin ang kahalagahan nang pagtutulungan sa pananatiling malinis lalo na ang mga anyong tubig sa mundo.
Tampok sa exhibit na may temang ‘Ebb and Flow: Return to Nature’ ang mga larawan ng anyong tubig na nilikha ng mga pintor.
“European and Filipino artists have come together: to show the beauty of water, its importance and what happens when water and the life that it sustains are nurtured or are ruined,” bahagi ng pahayag ni Ambassador Veron.
Batid ni Veron ang kasiyahang hatid ng tubig sa buhay ng tao tulad ng mga alon sa karagatan na nagpapagaan ng kalooban at mga karanasang hatid ng karagatang kung saan makikita ang mga yamang dagat.
Ayon kay Veron, layunin din ng exhibit na ipakita ang pagtutulungan ng mga taga Europa at mga Pilipino sa paglinang ng kultura.
“The “Ebb and Flow: Return to Nature” exhibition is part of the Viva Europa 2022 cultural festival, which aims to highlight shared European cultural heritage with Filipinos,” ani Veron.
Ang exhibit na magtatagal hanggang sa katapusan ng Mayo sa Yuchengco Museum sa Makati City na kasabay din ng pagdiriwang sa pagkakatatag ng European Union, EU Green Week sa May 30 hanggang June 5 at ang UN Oceans’ Conference na gaganapin sa Lisbon sa June 27 hanggang July 1.
Binigyang diin ni Veron ang paanyaya sa mamamayan na pagnilayan ang isa sa pinakamahalagang sangkap sa pamumuhay ng tao sa mundo.
“Ebb and Flow” is an invitation to meditation. “An invitation to meditate on life. No life without water. Yet, as we, sailors, know very well, water is indomitable. Our planet is blue, yet man cannot conquer the ocean. We are just its humble servants,” dagdag ni Veron.
Tampok sa Euro-Pinoy Visual Arts Exhibit ang mga likha nina César Caballero, Kizel Cotiw-an (Philippines), Ramon at Romania Diaz (Philippines and Italy), Louis Dumont (Belgium), Henri Etéve (France), Jeanette Kamphuis (Sweden), Radha Makitalo (Finland), Fara Manuel Nolasco (Philippines), Ann Pamintuan (Philippines), René Reitier (Germany), at Viviana Riccelli (Italy).
Kasama ni Ambassador Veron sa pagbukas ng exhibit si Yvonne Yuchengco, Chairwoman ng Yuchengco Museum at ang curator na si Cesar Caballero na dinaluhan ng mga kinatawan ng iba’t ibang bansa sa Europa at dating beauty queen na si Gloria Diaz.
Ang programa ay inisyatibo ng Delegation of the European Union to the Philippines, Yuchengco Museum, mga embahada ng Belgium, Germany, Spain (together with Instituto Cervantes Manila), France (together with Alliance Francaise de Manille), Italy (together with the Philippine Italian Association and Galleria Duemila), Finland, Sweden, and mga pintor mula sa University of the Philippines, Baguio City.
