859 total reads
Ikinagalak ni Marawi Bishop Edwin Dela Peña ang pagkakaroon ng tahanan ng mga nabiktima ng Marawi Siege noong 2017.
Itinuturing ng Obispo na isang biyaya ang relocation ng mga internally displaced person (IDP) o mga bakwit lalo na ang mga sakop ng St. Mary’s Cathedral na kabilang sa idineklarang ground zero matapos ang limang buwang sagupaan.
Ayon kay Bishop Dela Peña, magandang kaloob ito lalo na sa pagdiriwang ng kapistahan ni Maria Auxilliadora o Mary, Help of Christians.
“Today is another milestone for our parishioners at St. Mary’s Cathedral Parish because after almost five years of living as ‘bakwit’ or IDP’s on the fringes of Campo Ranao, Marawi City they have now been relocated and are now safely settled here in Maria Cristina, Balo-i,” bahagi ng pahayag ni Bishop Dela Peña.
Matatandaang kinubkob ng ISIS inspired-Maute terrorist group ang Marawi City noong May 17, 2017 kung saan humigit kumulang sa kalahating milyong indibidwal ang napilitang lumikas para sa kaligtasan.
Sa assessment na ginawa noong 2017 nasa 11.5-bilyong piso ang mga nasirang ari-arian habang pitong bilyon naman ang nawala sa 24 na lugar na ‘most affected areas’.
Ayon kay Bishop Dela Peña noong Mayo 2017 ipinagdiwang ang kapistahan ng patron ng prelatura sa Balabagan kung saan nakahanap na ligtas na lugar ang obispo at ilang residente.
Sa ikalimang taong pagdiriwang ng pista ng Maria Auxilliadora gaganapin ito sa Santo Tomas de Villanueva Parish sa Maria Cristina, Balo-i.
Pinasalamatan ng obispo ang CFC-ANGKOP Village na tumulong sa prelatura sa paggawa ng pabahay para sa mga IDP’s upang mabigyan ng maayos na tirahan.
Sa kasalukuyan, hindi pa rin 100-porsiyentong tapos ang rehabilitation project ng pamahalaan sa Marawi City.
