966 total views
Hinimok ng obispo ng Apostolic Vicariate of Taytay Palawan ang mamamayan na magbuklod sa pag-ibig at isantabi ang hindi pagkakasundo at pagkakaiba.
Ayon kay Bishop Broderick Pabillo ninanais ng Panginoon na magbuklod ang mananampalataya tulad ng Banal na Santatlo.
Paliwanag ng obispo na maisasakatuparan ang pagkakaisa sa tulong ng pag-ibig ng Diyos kung mamamayani sa puso ng mamamayan.
“Ang pairalin natin ay hindi ang ating pagkakaiba, kundi ang ating pag-iibigan. Malalampasan ng ating pag-ibig na walang iba kundi ang pag-ibig ng Diyos, kahit anuman ang ating pagkakaiba,” mensahe ni Bishop Pabillo.
Ang mensahe ng obispo ay kaugnay sa pagdiriwang ng simbahan sa Dakilang Kapistahan ng Banal na Santatlo.
Tinuran din ni Bishop Pabillo ang hidwaan sa nakalipas na halalan dahil sa magkakaibang kandidatong sinuportahan na nagdulot ng pagkakahati-hati sa pamayanan.
“Pero ang pagkakaisa sa pag-ibig ay hindi nagbabalewala sa ating pagkakaiba. Hindi nawala ang ating individualities. Nandiyan pa rin ang pagkakaiba natin at ang mga ito ay hindi naghihiwalay sa atin bagkus nagpapatingkad pa sa ating pagkakaisa,” giit ni Bishop Pabillo.
Ang Holy Trinity Sunday ay ipinagdiriwang ng simbahang katolika isang linggo makaraan ang Linggo ng Pentekostes bilang pagkilala sa iisang Diyos sa tatlong persona ang Ama, Anak at Espiritu Santo.
