729 total views
Nagpaabot ng pagbati si Caceres Archbishop Rolando Tria Tirona sa pamunuan ng NASSA/Caritas Philippines kaugnay sa isinasagawang pagtitipon ng mga diocesan social action director sa General Santos City, South Cotabato.
Ayon kay Archbishop Tirona, makabuluhan ang pagsasagawa sa 40th National Social Action General Assembly (NASAGA) dahil natatalakay dito ang iba’t ibang suliranin at pangangailangan ng diyosesis para sa pangangalaga sa kalikasan, at kalagayan ng mga nasa mahihirap na sektor na lubos na apektado ng mga pagbabagong nagaganap sa kapaligiran.
Sinabi ng Arsobispo na magandang pagkakataon din ito upang maipakita at maipahayag ng mga SAC directors at workers ang kanilang pangako at paninindigan para sa pagkakaroon ng payapang lipunan para sa ikabubuti ng lahat.
“Natutuwa akong makita ang ating mga agents of social change na nandito lahat para ipakita na sa panahon ng hindi natin alam, still nandyan ang committment ng ating social action directors, social action workers na ipalaganap ang common good, ang katarungan at lalong lalo na ang katotohanan,” pahayag ni Archbishop Tirona sa panayam ng Radio Veritas.
Tinatayang nasa 240 social action workers na kinabibilangan ng mga Pari mula sa 71 diyosesis ang nakibahagi sa NASAGA upang talakayin at makalikha ng programa para sa kaayusan ng lipunan.
Nagpapasalamat naman si Archbishop Tirona sa pagkakataong maimbitahan at makabahagi sa malaking pagtitipon ng social arm ng Catholic Bishops’ Conference of the Philippines.
Hangad ng Arsobispo na nawa’y mapaigting pa ng Caritas Philippines ang kanilang mga programa upang mas mapalaganap ang pagtulong ng simbahan tungo sa pagkakaroon nang maayos at mapayapang lipunan.
“Malaking kagalakan para sa akin na maging bahagi ng NASAGA 2022 kaya salamat kay Bishop Jose Colin Bagaforo sa pag-anyaya sa akin. Harinawa ang Caritas Philippines ay lumago pa at magkaroon nang mas malalim na impluwensya sa pagbabago ng ating lipunan,” saad ni Archbishop Tirona.
Bago ang kasalukuyang pamumuno ni Kidapawan Bishop Jose Colin Bagaforo, si Archbishop Tirona ang dating chairman ng CBCP-Episcopal Commission on Social Action, Justice and Peace na mas kilala bilang NASSA/Caritas Philippines simulantaong 2014 hanggang 2019.
