390 total views
Tiniyak ni Puerto Princesa Bishop Socrates Mesiona ang pagpapalawig ng mga hakbang ng simbahang katolika upang tugunan ang mga suliraning kinakaharap ng mga manggagawa sa sektor ng agrikultura.
Ang pahayag ng Obispo ay kaugnay sa pagtalakay ng mga suliranin ng mga magsasaka at mangingisda sa ginanap na National Synodal Consultation sa Carmelite Missionaries Center for Spirituality na dinaluhan ng kalipunan ng mga obispo.
“Ako ay nakikiisa sa ating mangingisda at magsasaka sa hinaharap nating mga krisis ngayon lalung lalu na sa kakulangan ng mga pagkain. Ito po ay sanhi ng maraming mga factors, mga bagay kaya kailangan po ng ating pagtutulungan, kailangan natin ng tulong-tulong tayo,” ayon sa pahayag ni Bishop Mesiona.
Sa pagtitipon ay nagkaroon ng pagkakataon ang mga manggagawa na ipahayag sa mga obispo ng Pilipinas ang mga suliraning kinakaharap ng sektor ng agrikultura.
Tulad ng mababang bilihan ng palay na umaabot lamang sa P14-P20 habang labis naman ang pagtaas ng presyo ng abono na nagkakahalaga ng P800-P2,000 bawat sako.
Nalulugi rin ang mga magsasaka dahil sa talamak na agricultural smuggling na umaabot sa P2M kada araw at ang pinsala ng Avian Influenza sa mga alagang hayop.
Una ng nanawagan ang Catholic Bishops Conference of the Philippines sa administrasyon ni Pangulong Ferdinand Marcos Jr. na bigyan tuon ang pangangailangan ng mga mangingisda at magsasaka ng Pilipinas upang matiyak na may pagkaing mapagkukunan ang mga Filipino.
