919 total views
Nangako ang bagong kalihim ng Department of Science and Technology (DOST) na ipagpapatuloy at paiigtingin ang mga nasimulang programa ng nakaraang administrasyon upang makatulong sa pagtugon sa pangangailangan ng lipunan.
Tiniyak ni bagong DOST Secretary Renato Solidum na patuloy na magiging epektibo ang iba’t ibang ahensyang saklaw ng kagawaran batay na rin sa mga layunin at programa ng administrasyon ni Pangulong Ferdinand “Bongbong” Marcos, Jr. sa mamamayan.
“Magaganda po ang programa ng DOST at ang kailangan po nating gawin ay puliduhin at i-allign ang mga programa ayon doon sa socio-economic agenda ng kasalukuyang administrasyon ni Pangulong Marcos, Jr. upang makatulong tayo sa paglutas ng mga suliraning hinaharap ng ating bansa,” pahayag ni Solidum sa panayam ng Radio Veritas.
Tinukoy ng kalihim ang priority programs ng DOST tulad ng pagbibigay ng hanapbuhay sa tulong ng science, technology and innovation; food and health and resilience program; pagsusulong ng pangangalaga ng kalikasan sa pamamagitan ng hybrid technology; at ang patuloy na pagtataguyod sa DOST Scholarship Program.
Samantala, nagpaabot naman ng pagbati ang dating kalihim ng DOST na si Dr. Fortunato dela Peña sa pagkakahirang kay Solidum bilang bagong kalihim ng kagawaran.
Ayon kay dela Peña, tiyak na maaayos na magagampanan ni Solidum ang pagiging DOST Secretary upang patuloy na paglingkuran ang mamamayang Pilipino.
“He is a model public servant and I am very confident that he will continue with DOST’s programs/projects/activities in bringing science to serve our people and in bringing progress, inclusiveness, and competitiveness for our country through science, technology and innovation,” pahayag ni dela Peña.
Taong 1984 nang magsimula si Solidum sa Philippine Institute of Volcanology and Seismology (PHIVOLCS) at naging direktor noong 2003 hanggang Pebrero 2017.
Itinalaga naman siya noong 2017 bilang DOST Disaster Risk Reduction Climate Change Adaptation Undersecretary ngunit nagpatuloy bilang officer-in-charge ng Phivolcs.
Si Solidum ay mayroong bachelor’s degree in Geology mula sa University of the Philippines, master’s degree in Geological Sciences mula sa University of Illinois, at doctorate degree in Earth Science mula naman sa University of California.
