855 total reads
Hiniling ni Tuguegarao Archbishop Ricardo Baccay sa mananampalataya na ipanalangin ang matagumpay na pagtitipon ng Federation of Asian Bishops’ Conference (FABC).
Sa liham ng Arsobispo sinabi nitong mahalaga ang pakikiisa sa pagdiriwang ng ikalimang dekada ng FABC na layong pagbuklurin ang mananampalataya tungo sa mas malalim na pananampalataya at matatag na simbahan sa Asya.
“Let us heed the call of the Bishops in this Conference to build awareness and interest among our faithful; It is our prayer that we may all together create a sense of participation in this continent-wide event in our Church,” ayon kay Archbishop Baccay.
Inilunsad ang pagdiriwang nitong August 22, 2022 sa isinagawang Inauguration of the General Conference sa Bangkok, Thailand.
Tema sa ika – 50 anibersaryo ng FABC ang ‘FABC 50: Journeying together as peoples of Asia ‘and they went a different way’ na hango sa ebanghelyo ni San Mateo chapter two verse 12.
Hinimok ni Archbishop Baccay ang mga parokya na dasalin ang panalangin sa FABC 50 sa lahat ng simbahan mula August 22 hanggang 30 at ipalaganap ang theme song na ‘The Church of Asia Bless Our God Who Walks With Us.’
Gaganapin ang FABC 50 General Conference sa October 12 hanggang 30 sa Pastoral Center ng Archdiocese of Bangkok sa Thailand na dadaluhan ng Episcopal Conferences ng South, Southeast, East at Central Asia.
Dumalo sa paglunsad ng general conference si San Jose Nueva Ecija Bishop Roberto Mallari ang chairman ng FABC – Office of Social Communication habang inaasahang dadalo sa Oktubre ang ilang obispo ng Catholic Bishops’ Conference of the Philippines sa pangunguna ni Kalookan Bishop Pablo Virgilio David – pangulo ng kalipunan kasama si Manila Archbishop Jose Cardinal Advincula.
