773 total views
Binatikos ng IBON foundation at Kalipunan ng Damayang Mahihirap o KADAMAY ang panawagan ng opisyal ng National Economic Development Authority sa mamamayan na bawasan ang labis na pagbili.
Iginiit ni Eufemia Doringo, Secretary General ng KADAMAY, na pang-iinsulto sa mga mahihirap ang panawagan ni NEDA Undersecretary Rosemarie Edillon na bawasan ang labis na pamimili upang hindi tumaas ang presyo ng mga pangunahing bilihin at serbisyo.
Binigyan-diin ni Doringo na walang pagpapahalaga ang pamahalaan sa sektor ng mga mahihirap na halos walang maipambili ng kanilang pang araw-araw na pangangailangan.
Pinatunayan naman ni Sonny Africa, Executive Director ng Ibon Foundation na walang kakayahan ang maraming pamilyang Pilipino na gumastos ng labis batay sa kanilang mga datos at Philippine Statistics Authority.
Tinukoy ni Africa ang pag-aaral ng IBON at PSA sa 3rd quarter ng taong 2022 na 19.4-milyong pamilya ang walang ipon habang tatlo sa bawat apat na pamilya ang sapat lamang ang kinikita sa kanilang pang araw-araw na pangangailangan.
“Hindi tama na sabihin sa kanila na magbawas sa pagbili, kasi ang kailangan nga nila ay ayuda para madagdagan ang binibili, lip service lang din ang sinasabing suporta sa produksyon kung wala naman itong kaakibat na sapat na budget,” paglilinaw ni Africa sa Radio Veritas.
Sa halip na maliitin ang mga mahihirap, pinayuhan ni Doringo at Africa ang NEDA at pamahalaan na ipatupad ang reporma sa sektor ng ekonomiya at mga polisiya na tutulong sa mahihirap na mamamayan na mapalakas ang “purchasing power”.
Iminungkahi ni Doringo at Africa sa pamahalaan ang pagpapatupad ng mga polisiyang magpapababa sa presyo ng mga produktong petrolyo, pangunahing bilihin, pagtatanggal at pagbawas sa excessive Value Added Tax.
Kabilang din ang pagtatakda ng iisang national minimum wage at family living wage.
