390 total views
Nanawagan ang mga lider ng Simbahan sa mga mananampalataya na kilalanin ang kanilang mga pagkukulang at magsikap na magbago bilang bahagi ng sama-samang pagninilay at pagsisisi ng Simbahan sa isinagawang Confessio Peccati na pinangunahan ng mga consecrated persons.
Ayon kay Novaliches Bishop Roberto Gaa, layunin ng inisyatiba na pukawin ang kamalayan ng mamamayan upang higit na mapangalagaan hindi lamang ang kalikasan kundi maging ang mga ugnayang panlipunan.
“Isang bagay ang pag-amin na tayo ay nagkulang, pero kaakibat ng pag-amin na tayo ay nagkulang ay ang ating pagnanais na magbago,” pahayag ni Bishop Gaa sa Radyo Veritas.
Ipinaliwanag ng obispo na mahalaga ang pagkilala sa mga pagkukulang bilang simula ng tunay na pagbabago, lalo na sa pangangalaga sa mga mahihinang sektor at mga nasa laylayan ng lipunan.
“Kailangang pangalagaan ang mga social structures na nangangalaga sa mga mahihirap, sa mga laborer, at sa mga pinakamahina sa sektor,” ayon sa obispo.
Umaasa rin si Bishop Gaa na magsisilbing paanyaya ang gawain upang gisingin ang kamalayan ng lipunan sa kanilang pananagutan sa kapwa at sa komunidad.
“Sana ito ay magpumukaw sa puso at isip ng mga tao na magising, mag-isip kung ano nga ba ang kailangang gawin, ano ang bahagi natin dito para mapangalagaan ang ating pamilya, ang universal family,” dagdag pa ng obispo.
Samantala, binigyang-diin naman ni Franciscan priest Fr. Angel Cortez, co-executive secretary ng Conference of Major Superiors in the Philippines, na ang paghingi ng tawad ay mahalagang hakbang upang maranasan ng tao ang awa at kapatawaran ng Diyos.
“Hindi natin matatanggap ang kapatawaran ng Diyos kung ang mga kasalanan natin bilang mga Katoliko at Kristiyano ay hindi natin aangkinin at aaminin,” paliwanag ni Fr. Cortez.
Ayon sa pari, ang paggunita sa Daan ng Krus ay paalala na sa kabila ng mga krisis at suliraning kinahaharap ng lipunan ay nananatili ang pag-asa sa pamamagitan ng pagmamahal at awa ng Panginoon.
“Sa lahat ng issue at crisis na pinag-uusapan, darating din ang tagumpay sa pamamagitan ng pagmamahal at awa ng Panginoong Hesukristo,” ani Fr. Cortez.
Dagdag pa ng pari, hindi dapat manatili sa panlabas na gawain ng debosyon ang pananampalataya ng mga mananampalataya kundi dapat itong magbunga ng tunay na pagbabagong-loob.
Isinagawa ang Confessio Peccati sa temang “Daan ng Krus, Lakbay ng Pag-asa at Pananampalataya” bilang bahagi ng panawagan ng mga consecrated men and women na hikayatin ang mga mananampalataya na magnilay sa kanilang mga pagkukulang sa Diyos, sa kapwa, at sa kalikasan, kasabay ng pananalangin para sa pagbabagong moral at panlipunan ng bansa.
Nagsimula ang gawain sa San Jose, ang Tagapagtanggol Parish na pinangunahan ni CMSP Chairperson Fr. Lino Gregorio Redoblado, OFM, kung saan halos 1,000 consecrated persons at mga layko ang sama-samang nagsagawa ng Daan ng Krus patungong Cathedral Shrine and Parish of the Good Shepherd, kung saan pinangunahan ni Bishop Gaa ang closing rites ng Confessio Peccati 2026.
