17,833 total reads
Dismayado ang Alyansa Tigil Mina (ATM) sa desisyon ng Senado na isantabi ang impeachment case laban kay Vice President Sara Duterte.
Ayon kay ATM national coordinator Jaybee Garganera, ang hakbang ng Senado ay malinaw na kabiguan sa pagsunod sa kanilang mandato bilang malayang institusyon ng pamahalaan.
“We are witnessing today the implementation of a distorted form of justice, where the rich and powerful are allowed to continue their abuse of power,” pahayag ni Garganera.
Binatikos din ng grupo ang kawalan ng transparency at pananagutan sa proseso, sa kabila ng malawakang panawagan ng taumbayan na ituloy ang paglilitis sa kaso.
Iginiit ni Garganera na sa halip na pakinggan ang hinaing ng publiko para sa bukas at makatarungang paglilitis, pinili ng Senado na talikuran ang kanilang tungkulin.
Sa huli’y tiniyak ng ATM ang pakikiisa sa mamamayang Pilipino sa panawagan para sa pananagutan ng mga halal na opisyal.
“We stand with all Filipinos who demand accountability from our elected leaders to serve the interests of the people, and not the political ambitions of dynasties and elites,” saad ni Garganera.
Una nang nanawagan si Catholic Bishops’ Conference of the Philippines (CBCP) Public Affairs executive secretary Fr. Jerome Secillano ng taimtim na panalangin at paggabay ng Espiritu Santo para sa mga opisyal ng pamahalaan na may tungkulin sa usaping legal, upang maging tapat at makatarungan para sa ikabubuti ng bayan.
