18,843 total reads
Humiling ng panalangin si Lipa Archbishop Gilbert Garcera makaraang mahalal bilang susunod na pangulo ng Catholic Bishops’ Conference of the Philippines.
Ayon sa arsobispo, mahalaga ang mga panalangin upang sa tulong ng Panginoon ay magabayan siya sa mabigat na responsibilidad sa kalipunan at sa kristiyanong pamayanan ng Pilipinas.
“Kung kaya’t ipagdasal po ninyo ako sapagkat napakabigat ng krus na nakapatong sa akin kaya sama-sama po tayo, tulong-tulong, magdarasal tayo upang ang kalooban ng Diyos ay mapasaatin,” pahayag ni Archbishop Garcera sa Radyo Veritas.
Sa katatapos na 130th CBCP Plenary Assembly na ginanap sa Anda Bohol ay napili si Archbishop Garcera na kahalili ni Kalookan Bishop Pablo Virgilio Cardinal David na matatapos ang termino sa November 2025.
Magsisilbing pangalawang pangulo ng kalipunan si Zamboanga Archbishop Julius Tonel na hahalili naman kay Pasig Bishop Mylo Hubert Vergara na matatapos din ang termino sa Nobyembre.
Hiling ni Archbishop Garcera sa mananampalataya ang pagbubuklod bilang mga kristiyano.
“Ipagpatuloy po ninyo ang sama-samang paglalakbay bilang mga Pilipino na nagkakaisa sa ngalan ni Hesus,” dagdag ng arsobispo.
Bukod kay Archbishop Garcera at Archbishop Tonel naghalal din ang CBCP ng mgq chairpersons sa iba’t ibang commissions, committees, at, offices.
Ginanap ang pagpupulong ng mga obispo mula June 30 hanggang July 7 kung saan sa unang bahagi ang retreat at national synodal consultations sa Tagbilaran City kasama ang mga synodal delegates mula sa iba’t ibang diyosesis sa bansa habang ang plenary proper ay ginanap sa Anda Bohol noong July 5 hanggang 7.
