24,706 total views
Patuloy na magiging katuwang ng mga mananampalataya ang Radio Veritas sa paglalakbay ngayong panahon ng Kuwaresma.
Ito ang tiniyak ni Radio Veritas President Fr. Roy Bellen kasabay ng paanyaya sa publiko na samantalahin ang panahon bilang pagkakataon ng pagbabalik-loob at mas malalim na pakikiisa sa Panginoon.
“Radio Veritas remains steadfast in its mission to be a trusted channel of communication for the faithful,” pahayag ni Fr. Bellen.
Ayon sa pari, lalong paiigtingin ng himpilan ang paghahatid ng mga programang magbibigay-linaw sa kahalagahan ng Pagpapakasakit, Pagkamatay, at Muling Pagkabuhay ni Hesus, lalo na sa nalalapit na pagsisimula ng Kuwaresma.
“In the coming weeks, especially as we approach the Paschal Triduum, we will continue to bring reflections, liturgical celebrations, catechetical programs, and spiritual guidance,” ayon sa pari.
Binigyang-diin din ni Fr. Bellen na ang Kuwaresma ay hindi lamang tradisyon kundi isang personal na paanyaya ng Diyos sa bawat isa na magnilay at mas paigtingin ang pakikipag-ugnayan sa kapwa.
Apela ng pari na bawasan ang pagkahumaling sa teknolohiya sa halip ay bigyang tuon ang panahon ng pananalangin at pagbabasa ng bibliya.
“In a world often filled with noise and distractions, even in technology, Lent calls us to silence and discernment. To spend more time with real people who are just beside us,” ani Fr. Bellen.
Sa February 18 pormal na magsisimula ang panahon ng kuwaresma sa Miyerkules ng Abo kung saan ang bawat binyagang kristiyano ay inaanyayahan sa pananalangin, pag-aayuno, at pagkakawanggawa.
Inaanyayahan ng himpilan ang mga Kapanalig sa mga misa sa Veritas Chapel sa Ash Wednesday kung saan sa alas 6 ng umaga ito ay pangungunahan ni Bishop Honesto Ongtioco, si Fr. Bellen naman sa alas 12 ng tanghali; habang si Novaliches Bishop Roberto Gaa naman sa alas 6 ng gabi.
Umaasa ang pangulo ng Radio Veritas na sa pamamagitan ng mga programa ng himpilan, mas mahikayat ang mga mananampalataya na magnilay, manalangin at ihanda ang puso sa pagdating ng Pasko ng Pagkabuhay, ang pinakarurok sa pananampalatayang kristiyano, ang tagumpay ng buhay laban sa kamatayan.
