26,864 total reads
Inihalal ng Catholic Bishops’ Conference of the Philippines si Kidapawan Bishop Jose Colin Bagaforo bilang bagong chairman ng Episcopal Commission on Interreligious Dialogue.
Si Bishop Bagaforo ang hahalili kay Prelature of Marawi Bishop Edwin de la Peña na magtatapos ang termino sa November 30, 2025.
Ang pagkakahalal sa obispo sa bagong tungkulin ay kasabay ng ginanap na 130th CBCP Plenary Assembly sa Anda Bohol.
Kilala si Bishop Bagaforo sa kanyang pamumuno sa pagsusulong ng kapayapaan, pakikipagtulungan sa iba’t ibang pananampalataya, at pagtataguyod ng katarungang panlipunan.
Naakma ang panibagong tungkulin ng obispo dahil sa kanyang malawak na karanasan sa pakikipag-ugnayan sa mga iba’t ibang grupo, relihiyon, at denominasyon, lalo na sa Mindanao.
“He will begin his new role with the Commission on Interreligious Dialogue as he concludes his term with Caritas Philippines, continuing his mission to promote unity, understanding, and cooperation among diverse faith communities across the country,” ayon sa anunsyo ng Caritas Philippines.
Kasalukuyang pinamumunuan ni Bishop Bagaforo ang Episcopal Commission on Social Action, Justice and Peace (ECSA-JP) at siya rin ang pangulo ng Caritas Philippines, ang humanitarian, development, at advocacy arm ng CBCP.
Magsisimula ang kanyang dalawang taong termino bilang pinuno ng Commission on Interreligious Dialogue sa Disyembre 1, 2025.
Samantala, si San Carlos Bishop Gerardo Alminaza—na kasalukuyang vice chairman ng ECSA-JP at Caritas Philippines—ang itatalaga bilang kapalit ni Bishop Bagaforo sa dalawang posisyong ito.
