8,237 total views
Inihayag ng Franciscan missionary sa Culion, Palawan, na isang magandang pagkakataon ang ginawang pastoral visit ni Taytay Palawan Bishop Broderick Pabillo sa mga malalayong isla na sakop ng bikaryato.
Ayon kay Fr. Andrew Litigio, OFM, ang pagdalaw ng obispo sa lugar ay naging daan upang makita ang tunay na kalagayan ng mamamayan at matulungan na maipaabot sa mga lider ng pamahalaan ang kanilang mga hinaing.
“Maraming implications itong pagdalaw ni Bishop Pabillo. Hindi man naririnig ng mga namumuno sa ating gobyerno ang hinaing ng mga mamamayan sa remote areas, pero sa pagbisita ni Bishop, nagkaroon ng pagkakataon ang mga tao na maidulog ang kanilang pangangailangan at napapakinggan ito ni Bishop, lalo na ang mga pangunahing pangangailangan,” pahayag ni Fr. Litigio sa Radyo Veritas.
Tinukoy ng pari ang kawalan ng maayos na daanan at mga tulay bilang ilan sa mga pangunahing pangangailangan ng komunidad upang mapabilis ang daloy ng ekonomiya, partikular ang pagdadala ng kanilang mga produkto sa mga pamilihan.
Ayon kay Fr. Litigio, sa pagbisita ni Bishop Pabillo, personal niyang nakita ang mga aspeto na kailangang tutukan upang matulungan ang mga mamamayan at maiparating ang mga ito sa mga lider ng bansa.
Gayundin, ang mga kapilya sa mga mission areas ay mahalagang ayusin, dahil ito ay nagsisilbing kanlungan sa mga pagdiriwang ng sakramento at sa tuwing may kalamidad.
Dagdag pa ni Fr. Litigio, “Ito rin ay pagsasabuhay sa diwa ng Synodality—magkaisang maglakbay bilang simbahan.”
“Ito ay bunga ng spirit ng Synod on Synodality at mga previous na panawagan ni Pope Francis na ‘go to the peripheries.’ Ang totoong misyon ng simbahan ay puntahan ang mga remote areas at ang mga nasa laylayan.” dagdag ni Fr. Litigio.
Ipinamalas din ni Bishop Pabillo sa kanyang pagbisita ang paggamit ng kanyang “baculo” (pastoral staff), lalo na sa pagtawid sa mga ilog at bilang pantungkod sa pagdalaw sa mga remote areas ng Northern Palawan.
“Ang paggamit ni Bishop Pabillo ng kanyang ‘pastoral staff’ ay hindi lamang ceremonial kundi experiential; ang layunin nito ay magbigay-alalay sa pagpunta, pagbisita, at pangangalaga sa nasasakupang kawan,” ani Fr. Litigio.
Ang San Isidro Mission Station sa Cagait, Culion, Palawan, ay pinamumunuan ng Order of Friar Minors at may limang nasasakupang lugar sa magkakahiwalay na mga isla, na tinatayang may higit 2,000 populasyon.
Mula nang maitalaga si Bishop Pabillo sa bikaryato ng Northern Palawan noong 2021, aktibo ito sa pagsasagawa ng pastoral visits sa mga nasasakupang lugar, kabilang na ang mga mission stations sa malalayong kanayunan.
