15,166 total reads
Nanawagan si Iligan Bishop Jose Rapadas III sa mga Basic Ecclesial Communities o BECs na maging “locus of synodality” at konkretong tanda ng pag-asa sa gitna ng kahirapan, korapsyon, digmaan, at lumalawak na kultura ng kawalang-pakialam sa lipunan.
Sa kaniyang pastoral message para sa pagdiriwang ng BEC Sunday kasabay ng Dakilang Kapistahan ng Kabanal-banalang Santatlo sa May 31, binigyang-diin ng obispo na kasalukuyang chairperson ng CBCP Episcopal Commission on Basic Ecclesial Communities, na ang Simbahan ay tinatawagan na isabuhay ang synodality o sama-samang paglalakbay bilang pamayanan.
“Today we are asked to express this in what we call synodality: walking together, listening to one another, discerning together, including those at the margins, and sharing responsibility for the mission,” ayon kay Bishop Rapadas.
Ipinaliwanag ng obispo na ang mga BEC ay isa sa mga pinakamalinaw na paraan upang maisabuhay ang tunay na pagkakaisa sa lipunan.
“Our Basic Ecclesial Communities (BECs) are one of the most concrete ways we can live this Trinitarian and synodal identity,” dagdag pa ng obispo.
Nagbabala rin si Bishop Rapadas sa lumalalang sugat ng lipunan, bunsod ng malawakang korapsyon lalo na sa mga institusyong inaasahang mangangalaga sa kabutihang panlahat.
“Corruption robs the poor and destroys trust in institutions for the common good,” giit ng obispo.
Tinukoy rin nito ang mga suliraning pangkalikasan tulad ng mas malalakas na bagyo, pagbaha, pagtaas ng lebel ng dagat, pagmimina, at polusyon na matinding nararanasan ng mga maralita.
Kasabay nito, binigyang-diin ni Bishop Rapadas ang panganib ng “globalization of indifference” o kultura ng pagiging manhid sa pagdurusa ng kapwa.
“When we grow used to injustice, corruption, war, and environmental destruction, indifference has already taken root,” saad ng obispo.
Ayon kay Bishop Rapadas, ang mga unang Kristiyanong pamayanan na inilarawan sa aklat ng Mga Gawa ng mga Apostol ay huwaran ng tunay na synodality dahil namuhay ang mga ito sa panalangin, pagbabahaginan, at malasakit sa isa’t isa.
“This is, in a sense, the original ‘Basic Ecclesial Community’: a small local Church where faith, fellowship, and mission mark daily life; where indifference is replaced by concrete solidarity,” paliwanag ni Bishop Rapadas.
Hinimok din ng obispo ang mga BEC na maging aktibong pamayanan hindi lamang sa pananampalataya kundi maging sa pangangalaga sa kalikasan at pagsusulong ng mabuting pamamahala.
“They can also be basic civic communities that help form responsible citizens, offering spaces for honest dialogue on social issues, voter education, and peaceful engagement for the common good, resisting corruption and lies without becoming partisan,” ani Bishop Rapadas.
Sa huli, hinamon ng obispo ang mga BEC na maging buhay na saksi ng pag-asa at pagkakaisa sa gitna ng sugatang daigdig.
Batay sa kasaysayan, dekada sisenta nang maitatag ang BEC, kasunod ng Second Vatican Council, kung saan nangunguna rito ang Brazil at Pilipinas.
Noong 1991, sa Second Plenary Council of the Philippines, naging bahagi ng pastoral priority ng simbahan sa bansa ang BEC na layong mapagtibay ang pamayanan at higit na maisulong ang misyon ng simbahan.
