478 total reads
Ang usapin ng pamilya ay usapin din sa politika.
Ito ang ibinahagi ng isang opisyal ng Catholic Bishops’ Conference of the Philippines (CBCP) kaugnay sa pagiging ‘basic unit of society’ ng pamilya na kinakailangan para sa pagkakaroon ng isang matatag na lipunan.
Ayon kay Taytay, Palawan Bishop Broderick Pabillo, chairman ng CBCP-Episcopal Commission on the Laity dapat na kabilang sa mga suriin ng botante sa mga kandidato sa darating na halalan ay ang estado at pagiging tapat sa kanilang pamilya.
Ipinaliwanag ng Obispo na mahalaga ring suriin ng mga botante ang paninindigan ng mga kandidato sa pagpapatatag ng pamilyang Pilipino.
“Ngayong mag-eeleksyon na, isa sa mga pagsusuri natin sa mga kandidato ay paano ba ang pamilya niya? Kung hindi siya tapat sa kanyang pamilya, magiging tapat ba siya sa kanyang mga pangako? Ano ang paninindigan niya sa pagpapatatag ng pamilya? The family is the basic unit of society. Kapag malakas ang basic unit natin, makakaasa tayo ng matatag na lipunan. Kaya ang usapin ng pamilya ay usapin din sa politika.” panawagan pagninilay ni Bishop Pabillo.
Una ng nagpahayag ng pagkabahala si Bishop Pabillo sa ginagawang hakbang ng mga mambabatas na sa halip na palakasin pa ang pundasyon ng pamilya ay nais pa itong pahinain at buwagin sa pamamagitan ng pasusulong ng divorce law sa bansa.
Pagbabahagi ng Obispo, ang divorce ay maaaring makapagdulot ng kaguluhan sa lipunan kung saan malaki ang epekto ng paghihiwalay ng mag-asawa sa mga anak na nagdudulot ng pang-matagalang paghihirap at pagdurusa sa mga kabataan.
“Alam naman natin ang nangyayari sa ibang mga bansa dahil sa divorce. Hindi naman napatatag ang pamilya. Mas maraming naghihiwalay, mas maraming mga kababaihan at mga bata ang nadadala sa kahirapan sa buhay. Malaki ang epekto ng paghihiwalay ng mag-asawa sa mga anak. Mas gumugulo ang lipunan dahil sa divorce, kasi kung mahina ang pamilya, humihina rin ang lipunan.” Dagdag pa ni Bishop Pabillo.
Giit ng Obispo, mahalagang maibalik muli ang bawat pamilya sa piling ng Diyos sa pamamagitan ng sama-samang pagdarasal at pagbabasa ng Bibliya bilang gabay ng Kristiyanong mag-anak.
