25,888 total reads
Iginiit ni Kalookan Bishop Cardinal Pablo Virgilio David na walang puwang ang pag-abuso sa kapangyarihan sa isang demokrasyang nakasalalay sa tiwala ng bayan.
Sa kanyang homiliya sa ikapitong misa nobenaryo ng National Shrine of Our Lady of Peace o EDSA Shrine, sinabi ng kardinal na hindi nararapat mamuno sa bayan ang mga tiwaling opisyal.
“Walang karapatang mamahala ang sino mang sumisira sa tiwala ng bayan,” ayon kay Cardinal David.
Binigyang-diin ng kardinal na ang panunungkulan sa pamahalaan ay hindi pag-aari kundi isang pananagutan sa Diyos at sa mamamayan.
Iginiit ni Cardinal David na ang pundasyon ng pamamahala ay public trust.
Ipinaliwanag din ng kardinal ang kahulugan ng transparency at accountability sa mas payak na wika.
“Ang pinakamalapit na salitang Tagalog para sa transparency ay ‘walang tinatago,’ at para sa accountability ay ‘handang managot,’” ani Cardinal David.
Ayon sa kanya, hindi lamang mga lingkod-bayan ang dapat magsuri ng sarili kundi maging ang mamamayan.
“Imposibleng magkaroon ng good governance kung walang responsible citizenship,” paalala ng kardinal, sabay panawagan ng isang “moral reset” para sa bansa.
Kasabay ng pagninilay sa Unang Linggo ng Kuwaresma, pinaalalahanan ni Cardibal David ang mga mananampalataya na ang kapangyarihan ay ipinagkakatiwala at hindi inaangkin.
Dagdag pa niya, maaaring malinlang ang tao, ngunit hindi ang Diyos.
“Hindi tayo boss. Hindi tayo amo. Tayo’y katiwala… Pwede mong lukohin o pagtaguan ang bayan. Pero pwede mo bang lukohin o dayain ang Panginoong Diyos?” ayon sa kardinal.
Hinimok ng kardinal ang lahat na pangalagaan hindi lamang ang tiwala ng bayan kundi higit sa lahat ang tiwalang ipinagkaloob ng Diyos sa bawat isa bilang mga katiwala ng Kanyang nilikha.
Kabilang din si Cardinal David sa mga tagapagsalita sa Prayer Power sa EDSA kabilang ang mga kilalang personalidad na kaisa sa pagsusulong ng pananagutan sa mga lider ng bayan.
Ito rin ay paggunita sa yumaong Jaime Cardinal Sin na noo’y arsobispo ng Manila na nanawagan sa taumbayan sa pamamagitan ng Radio Veritas na magtungo at magbuklod sa EDSA na naging mitsa sa tinaguriang bloodless at peaceful revolution na nagpatalsik sa diktaduryang pamamahala ni dating Pangulong Ferdinand Marcos, Sr.
