23,279 total views
Umapela na ng tulong ang Caritas Kalookan sa social arm ng Archdiocese of Manila para sa mga naapektuhan ng sama ng panahon na dulot ng Habagat sa nasasakupang lugar ng diyosesis.
Sa panayam sa Radyo Veritas, ay inihayag ni Sr. May Cano, OP. – Program Coordinator ng Caritas Manila mula Diyosesis ng Kalookan na sumulat na sa Caritas Manila ang diyosesis sa pangunguna ni Caritas Kaloocan President Fr. Alan Lopez, OP para sa pangangailangan ng mga apektadong residente sa diyosesis.
Tiniyak rin ng Madre ang pagbabantay sa sitwasyon sa diyosesis kabilang na ang kalagayan ng mga apektadong residente at mga mamamayan dulot ng patuloy na banta ng sama ng panahon dahil sa Hanging Habagat.
Inihayag naman ni Sr. Cano na kabilang sa inisyal na pangangailangan ng mga apektadong residente sa diyosesis ang mga kumot, inuming tubig at pagkain.
“Sumulat na po kami ni Fr. Alan Lopez, OP [Caritas Kaloocan President] sa Caritas Manila, nagpasa na kami ng sulat [letter of appeal] kahapon kay Fr. Anton CT Pascual [Pangulo ng Caritas Manila] dahil nakausap ko po siya last Thursday nagmeeting kami at nagbibigay kami ng update ngayon kung ano po lahat ang apektado para po ma-update namin kayo sa mga pangyayari dito sa Diocese of Kalookan. Kailangan po ang mga blankets, mga bottled water, purified water, saka pagkain po.” Bahagi ng pahayag ni Sr. Cano sa Radyo Veritas.
Kabilang sa partikular na mga lugar na tinukoy ng Madre na apektado ng sama ng panahon sa Diyosesis ng Kalookan ang Barangay Tonsuya, Malabon; Barangay Tanza Dos, Navotas; San Bartolome Parish, Malabon; komunidad malapit sa Dela Paz Elementary School, Malabon; gayundin ang Barangay Panghulo, Malabon.
Kabilang sa nasa lugar na nasasakop ng Diyosesis ng Kalookan ang Malabon, Navotas at southern Kalookan.
