36,244 total views
Mariing ipinahayag ng Catholic Bishops’ Conference of the Philippines (CBCP) ang kanilang pagkabahala sa pagkaantala ng proseso ng impeachment laban sa Pangalawang Pangulo, na nagpapakita ng kakulangan sa transparency at accountability sa pamahalaan.
“We are disturbed by the delay in the Senate in executing the constitutional demand for the impeachment process of the Vice President,” bahagi ng pastoral letter na inilabas matapos ang 130th Plenary Assembly na nilagdaan ni CBCP President, Kalookan Bishop Pablo Virgilio Cardinal David.
Binanggit ng CBCP na ang impeachment, kung ito ay isasagawa batay sa katotohanan at katarungan, ay isang lehitimong demokratikong mekanismo upang tiyakin ang pananagutan sa pamahalaan.
“We affirm that impeachment, when pursued with truth and justice, is a legitimate democratic mechanism for transparency and accountability in governance.” bahagi ng pastoral statement ng CBCP
Hinimok ng mga obispo ang mga mananampalataya na huwag maging manhid sa mga isyung moral at panatilihing bukas ang isipan sa pakikinig sa lahat ng panig.
“We call our faithful to combat moral indifference, listen to all sides with openness, and foster a culture of engaged citizenship rooted in our Christian faith.”
Bukod sa usapin ng impeachment, tinutukan din sa pastoral letter ng CBCP ang mga isyu ng karahasan sa Gaza, makatarungang sahod, at dignidad sa paggawa.
Sa usapin ng Gaza, nanawagan ang CBCP ng panalangin, pag-aayuno, at pag-aalay ng sakripisyo para sa kapayapaan. Mariin nilang kinondena ang paggamit ng kagutuman bilang sandata ng digmaan.
“We condemn the weaponization of starvation. Let food and badly needed humanitarian aid benefit all.”
Kinilala rin ng mga obispo ang krisis sa sahod ng mga manggagawa sa Pilipinas. Binanggit ng kalipunan ng mga obispo na ang kasalukuyang sahod ng karamihan ay hindi sapat upang tugunan ang pangunahing pangangailangan ng mga pamilya.
“We are aware of the plight of workers in our country that the salaries they receive are much below the living wages that enable workers to meet their needs and support their families.”
Hinimok ng simbahan ang pakikipagdayalogo ng mga manggagawa, employer, at pamahalaan upang makamit ang makatarungang sahod at seguridad sa trabaho, ayon sa panuntunan ng Simbahan hinggil sa social justice.
Inanyayahan naman ng CBCP ang mga pari, layko, manggagawa, at mga lider sa pulitika na magkaisa sa pagtataguyod ng makatarungan at mapayapang lipunan.
“Let us rekindle our hope, strengthen our solidarity and remain vigilant in our stewardship of truth, justice, and the dignity of every human person.”
