18,896 total reads
Nanawagan ng pagkakaisa ang Catholic Educational Association of the Philippines o CEAP sa mga bumubuo sa education sector upang hindi na lumalala ang nararanasang karahasan sa mga paaralan sa Pilipinas.
Tugon ni CEAP Executive Director Narcy Ador Dionisio kasunod ng karahasan sa iba’t-ibang paaralan sa bansa sa nakalipas na buwan.
Iginiit ni Dionisio na bilang katolikong samahan ng mga paaralan ay isinusulong ang kasagraduhan at pangangalaga sa buhay ng tao.
Inihayag ni Dionisio na ang mga pangyayari ay patunay na mayroong kakulangan sa pagtuturo ng values formation, paggalang at habag sa mga mag-aaral maging ng kawani ng mga paaralan.
“The recent incidents of violence in schools deeply challenge our mission as Catholic educators to uphold the sanctity of life and the dignity of every person. These acts of aggression reveal a breakdown in values formation, empathy, and respect, which calls us to strengthen our commitment to integral human development,” ayon sa ipinadalang mensahe ni Dionisio sa Radyo Veritas.
Nanawagan din si Dionisio sa mga opisyal, guro, kawani, magulang, legal guardians at iba pang nangangalaga sa mga estudyante na magdaos ng mga dayalogo at wastong pakikipag-ugnayan sa mga kabataan upang mahanap at tunay na matugunan ang karahasan.
Hinimok din ng opisyal ng CEAP ang mga katolikong relihiyosong guro na paigtingin ang pagtuturo ng mabuting asal at kasagraduhan ng buhay gayundin ang pagsasapuso ng pagmamahal sa kapwa o pagkakapatiran.
“Guided by the CEAP values of truth and justice, we must address the root causes of violence through honest dialogue, restorative practices, and just systems that protect both students and teachers. In the spirit of peace, we are called to cultivate safe and nurturing environments where conflicts are resolved through understanding rather than harm. As a communion in mission, we stand united to heal our communities, rebuild trust, and reaffirm our shared responsibility to form compassionate, life-affirming learners,” ayon pa sa mensaheng pinadala ni Dionisio sa Radyo Veritas.
Napag-alaman na naganap ang karahasan sa loob ng paaralan sa Pasig at Paranaque gayundin sa Nueva Ecija at Lanao del Sur.
Sangkot ang mga estudyante sa pananaksak at pagpatay sa kapwa estudyante at kanilang mga guro.
