27,512 total reads
Tiniyak ng Catholic Educational Association of the Philippines (CEAP) ang pagsusulong ng kahalagahan sa mas matibay na pakikipagtulungan ng mga Local Government Units (LGU) at mga paaralan upang maisulong ang kalidad, inklusibo, at pangmatagalang pagbabago o pag-unlad para sa sektor ng edukasyon.
Sa isinagawang CEAP Special Learning Session na may temang “LGU Threads: LGUs as Champions of Educational Change,” inihayag ni CEAP Executive Director Narcy Ador Dionisio na mahalagang gampanan ng mga LGU ang mas aktibong pakikiisa sa pagpapatibay ng pundasyon ng edukasyon.
““We are here to learn from Baguio City and its vision of people empowerment through education, and how its initiatives create an enabling environment where communities can flourish,” pahayag ni Dionisio
Binigyang-diin din ang mga rekomendasyon ng Second Congressional Commission on Education (EDCOM 2), kabilang ang pamumuhunan sa unang 1,000 araw ng bata, pagpapabuti ng nutrisyon sa paaralan, pagpapalawak ng Early Childhood Care and Development, at pagpapalakas ng batayang pagbabasa at wastong pag-unawa sa mga babasahin.
Ibinahagi naman ni Baguio City Mayor Benjamin Magalong na hindi lamang tungkulin ng mga paaralan ang paghahatid ng kalidad na edukasyon kundi ng buong komunidad dahil mahalaga ang pakikipagtulungan ng mga LGU, mga paaralan, pamilya, pribadong sektor, at iba pang katuwang upang makalikha ng kapaligirang nagbibigay ng pantay na oportunidad sa bawat mag-aaral.
Kabilang sa mga inilahad niyang inisyatibo ay ang pagsusulong ng Parent Academy, pagpapalakas ng Local School Board, at pakikipag-ugnayan sa mga institusyong gaya ng Saint Louis University para sa mga programa sa literasiya, kalusugang pangkaisipan, at pananaliksik.
“The systems that you build are not dependent on who sits as the leader. We are creating a legacy that does not need to be identified with us but is part of the institution’s DNA so that it will be able to endure leadership transitions,” bahagi pa ng mensahe ni Magalong.
Kasabay nito, hinikayat ng CEAP ang mga paaralan at lokal na pamahalaan na patuloy na bumuo ng matatag na sistemang pang-edukasyon na magtatagal lampas sa pagbabago ng mga lider.
Kaugnay nito, patuloy ding binibigyang-diin ng Simbahan ang kahalagahan ng edukasyong nakabatay sa pakikipagtulungan, pananagutan, at pagsusulong ng dignidad ng bawat bata, alinsunod sa panawagan ni Pope Leo XIV na gawing sentro ng pag-unlad ng lipunan ang tao, lalo na ang kabataan.
