1,814 total views
Nananawagan sa pamahalaan ang Sibuyanons Against Mining (SAM) para sa agarang pagpapatupad ng cease and desist order laban sa ilegal na operasyon ng Altai Philippines Mining Corporation (APMC) sa Sibuyan Island, Romblon.
Ayon kay SAM Coordinator Elizabeth Ibañez, kailangang agad na mapahinto ang operasyon ng ilegal na pagmimina sa Sibuyan Island upang hindi na lumawak pa ang pinsala nito sa kalikasan at magdulot ng panganib sa mga residente.
“Hinihingi natin ang agarang aksyon ng [Department of Environment and Natural Resources] Secretary through [Mines and Geosciences Bureau] Regional Director to issue a cease and desist order. Ang mabagal na aksyon ng DENR ay magdudulot ng malawak na pinsala sa Isla ng Sibuyan at kapahamakan sa mga mamamayan, “ bahagi ng pahayag ni Ibañez.
Tinukoy din ni Ibañez ang kawalang kakayahan ng mga opisyal ng Sangguniang Bayan ng San Fernando at Pamahalaang Panlalawigan ng Romblon sa pagtugon sa panawagan ng taumbayan.
Iginiit ni Ibañez na sa halip na ipagtanggol ang kapakanan ng kinasasakupan ay pinagtatanggol pa ng mga opisyal ang ilegal na operasyon ng APMC.
“Walang maaasahang aksyon mula sa mga pinuno ng bayan at probinsya dahil lagi nilang ipinapasa ang kilos o aksyon sa national agency dahil sila ay takot at walang kapasidad na gampanan ang kanilang tungkulin sa mga mamamayan bagkus sila mismo ang tumatayong tagapagtanggol at tagapagsalita ng minahan,” giit ni Ibañez.
Noong Pebrero 3 ay napagkasunduan sa pagpupulong sa pagitan ng mga residente ng Sibuyan Island, Altai Mining at mga opisyal ng lokal at ahensya ng pamahalaan na isailalim muna sa status quo ang mining operation sa isla.
Nananatili naman sa nilikhang barikada ang mamamayan ng Sibuyan upang bantayan ang pagkilos at gawain ng APMC.
