15,884 total reads
Nakatakdang mag-alay ng Misa ng Bayan ang Conference of Major Superiors in the Philippines (CMSP) upang ipanalangin ang patuloy at ganap na pagkamit ng kapayapaan at katarungan sa bansa.
Nakatakda ang Misa ng Bayan sa ika-26 ng Setyembre, 2025 ganap na alas-singko ng hapon sa Religious of the Good Shepherd Convent (RGS), sa Aurora Boulevard, Katipunan, Quezon City.
Ayon sa CMSP, layunin ng Misa ng Bayan na ipagpatuloy ang pananalangin at paninindigan laban sa katiwalian sa lipunan na isa ring paraan upang isulong ang nasimulang adhikain noong ika-21 ng Setyembre, 2025 sa mamamagitan ng sama-samang pananalangin para sa bansa ngayong ginugunita ng Simbahan ang Jubilee Year of Hope.
“Bilang pagpapatuloy ng ating laban sa korupsyon at ng mga adhikain na ating nasimulan noong Setyembre 21, muli tayong titindig at maglalahad ng ating saloobin sa pamamagitan ng pagkakaisa at sama-samang panalangin sa Misang ito.” Bahagi ng paanyaya ng CMSP.
Bilang nag-iisang komunidad sa pananampalataya ay inaanyayahan ng Conference of Major Superiors in the Philippines (CMSP) ang bawat mananampalataya na makibahagi sa gawain para sa pananalangin para sa kinabukasan ng bayan.
Inaanyayahan rin ang lahat na magdala ng kandila bilang simbolo ng pagkakaisa at malinis na hangarin para sa pagbabago sa bayan.
Una ng binigyang diin ng CMSP-Justice, Peace, and Integrity of Creation Commission (CMSP–JPICC) na ang usapin ng katiwalian sa kaban ng bayan ay hindi lamang usaping politikal sa halip ay isang malalim na kasalanang moral at espiritwal na bumibiktima sa mga mahihirap at sumisira sa kinabukasan ng mga kabataan kaya naman maituturing na isang pananagutan moral na naayon din sa Ebanghelyo ang paninindigan laban sa katiwalian sa pamahalaan.
Matatandaang aktibong nakibahagi ang CMSP at mga kasaping organisasyon nito sa iba’t ibang pagkilos na naganap para sa Araw ng Pambansang Protesta at Pagkondena sa Katiwalian noong ika-21 ng Setyembre, 2025 kabilang na: ang pagtitipon sa Manila Cathedral at martsa patungong Luneta; ang Bahain ang Luneta mobilization; at ang Trillion Peso March sa EDSA People Power Monument.
