6,783 total reads
Magsasagawa ng press conference ang simbahan, katuwang ang mga mangingisda at mga dalubhasa sa karagatan, upang ibahagi at ipaliwanag ang pahayag ng Catholic Bishops’ Conference of the Philippines hinggil sa pagtutol sa desisyon ng Korte Suprema.
Kaugnay ito sa pagpapahintulot ng kataas-taasang hukuman sa commercial fishing sa loob ng 15-kilometer municipal fishing zone.
Gaganapin ang press conference sa Sabado, February 1, 2025, mula alas-11 ng umaga hanggang alas-12 ng tanghali sa Serviam Hall ng National Shrine of Mary, Queen of Peace o EDSA Shrine sa Ortigas, Quezon City.
Dito’y tatalakayin ng mga kinatawan mula sa iba’t ibang sektor ang mga usaping moral, panlipunan, at pang-ekonomiya kaugnay ng nasabing desisyon at ang epekto nito sa mahigit 2.3 milyong maliliit na mangingisda at sa kalikasan.
Kabilang sa mga magiging tagapagsalita sina Caritas Philippines Vice President, San Carlos Bishop Gerardo Alminaza; Oceana Philippines Vice President, Atty. Gloria Estenzo-Ramos; PANGISDA Pilipinas President Pablo Rosales; PAMALAKAYA Pilipinas Vice Chairperson Salvador France; Sangguniang Laiko ng Pilipinas President Xavier Padilla; at Federation of Free Farmers Chairperson Leonardo Montemayor.
Sa katatapos lamang na 129th CBCP Plenary Assembly, mahigit 40 obispo ang lumagda sa liham-pastoral bilang pagpapahayag ng mariing pagtutol sa desisyon ng Korte Suprema.
Samantala, babasahin naman ang pastoral letter sa lahat ng misa sa buong bansa sa February 2, upang ipalaganap ang mensahe ng mga obispo at hikayatin ang mga mananampalataya na pagnilayan ang usapin at suportahan ang panawagan para sa kapakanan ng mga mangingisda at pangangalaga sa karagatan.
Mapapakinggan naman ang press conference sa programang Veritasan ng Radyo Veritas sa DZRV846 AM; at mapapanood sa DZRV 846 facebook page; Veritas PH sa Youtube, at Veritas TV Sky Cable Channel 211.
