28,492 total reads
Nagpaabot ng taos-pusong pasasalamat si Camillian Fr. Dan Cancino, executive secretary ng Catholic Bishops’ Conference of the Philippines – Episcopal Commission on Healthcare (CBCP-ECHC), kay Naval, Biliran Bishop Rex Ramirez sa masigasig na paglilingkod at paggabay bilang chairman ng komisyon.
Ayon kay Fr. Cancino, naging mahalagang haligi si Bishop Ramirez sa loob ng anim na taon, kung saan pinatatag nito ang misyong pastoral ng CBCP sa larangan ng kalusugan.
Magtatapos ang termino ni Bishop Ramirez sa November 30, 2025, at papalitan ni Imus, Cavite Bishop Reynaldo Evangelista bilang bagong chairman ng CBCP-ECHC.
“Maraming, maraming salamat kay Bishop Rex Ramirez… ginabayan ni Bishop Rex ang komisyon ng healthcare ng CBCP ng maraming taon sa kanyang presensya, sa kanyang karunungan, sa kanyang pagbibigay ng gabay,” pahayag ni Fr. Cancino sa panayam ng Radyo Veritas.
Nagagalak rin si Fr. Cancino sa paghirang kay Bishop Evangelista, na inanunsyo sa 130th CBCP Plenary Assembly na ginanap sa Anda, Bohol noong July 5, 2025.
Sinabi ng Pari na puno ng pag-asa at sigla ang komisyon sa pagpasok ng panibagong yugto ng paglilingkod sa ilalim ng bagong pamunuan, tungo sa higit pang pagpapaigting ng mga programang pangkalusugan ng Simbahan.
“Siyempre,excited ang healthcare commission. Ano kaya ‘yung mga mangyayari sa ating komisyon? Pero coming from the different regional healthcare consultation ng mga different dioceses, may mga namumutawi tayong mga priority programs na ako sa tingin ko na si Bishop Rey ay talagang magbibigay ng gabay tungkol dito,” saad ni Fr. Cancino.
Kabilang sa mga pangunahing adbokasiya ng CBCP Healthcare Ministry ang pagbibigay ng espirituwal na kalinga sa mga pasyente at healthcare workers, sa pamamagitan ng mga chaplain, kabilang ang lay partners, upang mapalawak ng presensiya ng Simbahan sa mga ospital.
Ayon kay Fr. Cancino, layon din ng komisyon na palalimin ang ugnayan sa mga parokya at barangay, lalo na sa Basic Ecclesial Communities (BECs), upang maabot ang mas maraming maysakit sa mga pamayanan.
Tututukan din ng ECHC ang lumalalang kaso ng depression, anxiety, at suicide sa pamamagitan ng parish-based mental health program na nakabatay sa pananampalataya at espirituwalidad bilang mahalagang bahagi ng paggaling.
Bahagi rin ng programa ang pagpapaigting ng Community-Based Healthcare na nakatuon sa tuberculosis at iba pang karamdaman.
“Marami tayong mga chapters all over the country, 181 chapters, ng mga different healthcare groups under the parish na nagpapalaganap ng kaalaman at kamalayan tungkol sa community-based healthcare program,” pagbabahagi ni Fr. Cancino.
