10,366 total views
Hinamon ni Taytay Palawan Bishop Broderick Pabillo ang lahat ng electronic wallets o e-wallet service provider sa Pilipinas na ipagbawal ang mga cash transactions sa lahat ng online gambling sa buong bansa.
Ito ay kasunod ng hakbang ng nangungunang e-wallet na GCASH at Pay Maya kung saan ipinagbawal na ang anumang online gambling money transfer at transaction simula August 16.
Ikinababahala ng Obispo na sa pag-usbong ng makabagong teknolohiya ay nagsulputan din ang mga e-wallets sa Pilipinas kaya’t may pamamaraan pa rin ang mga nalulong sa online gambling na makapaglipat ng kanilang pera upang makapaglaro.
“Kasi ito ay nakakasira sa mga tao, lalo na sa mga kabataan at mahihirap, so yan po ay isang bold move pero hindi po sapat, ang hinihingi po natin sa lahat ng e-wallets na ipagbawal ang online gambling,” ayon sa panayam ng Radyo Veritas kay Bishop Pabillo.
Aminado si Bishop Pabillo na isang bold move ang ginawa ng ilang e-wallets service provider pero hindi ito sapat upang masawata ang online gambling.
Panawagan at hamon ni Bishop Pabillo sa pamahalaan at mga mambabatas na tuluyang ipagbawal ang online gambling sa Pilipinas na itinuturing na bagong salot sa Lipunan.
“Okay naman yung pagbabawal sa anumang online gambling transaction, pero hindi sapat ito-hindi sapat, kasi ang gusto natin, ipagbawal sana ng lahat ng mga e-wallets, alam po natin na ang GCASH, isa lamang sa mga e-wallets dahil marami pang mga ibang e-wallets, dapat ang polisiya sa gobyerno, talagang wala ng online gambling,” ayon pa sa panayam ng Radyo Veritas kay Bishop Pabillo.
Naunang kinilala ni CBCP President Kalookan Bishop Pablo Virgilio Cardinal David ang hakbang ng Bangko Sentral ng Pilipinas na i-regulate ang access ng online gambling sa mga e-wallet provider.
Gayunman, nanindigan si Cardinal David na hindi sapat ang hakbang ng BSP kayat muli itong nanawagan sa pamahalaan na tuluyang ipagbawal ang online gambling sa bansa.
Ayon sa datos ng Philippine Amusement and Gaming Corporation (PAGCOR), umabot sa 32 milyong Pilipino ang aktibong nakilahok sa online gambling mula January hanggang May 2025 na katumbas ng 291% na pagtaas kumpara noong nakaraang taon.
iniulat ng Recovering Gamblers of the Philippines na 80% ng kanilang mga pasyente sa rehabilitation center ay nabiktima ng online gambling, na hindi lamang nagdulot ng pagkalugi ng pera o kita kundi nagbunga rin ng depresyon at pagkawasak ng buhay, pamilya, at relasyon sa kapwa.
