36,793 total views
Hinimok ng Lipa Archdiocesan Social Action Center (LASAC) ang mga Diocesan Social Action Centers na magtulungan at pagtingin ang paglaban sa malnutrisyon sa Pilipinas at lumalalang krisis ng education poverty sa mga kabataan.
Ito ang mensahe ni LASAC Executive Director Father Jayson Siapco bilang paghahanda ng kanilang Diocesan Social Action Commission (DSAC) sa nalalapit ng ika-siyam na pagdiriwang ng World Day of the Poor.
Ayon sa Pari, ang pagtugon sa dalawang suliranin ay tungkulin ng simbahan upang hubugin ang susunod na henerasyon at maging handa bilang mabuting mamamayan na sinusunod at kaisa ng simbahan sa anumang pagkakataon.
“Sa ating mga kasama sa paglilingkod sa social action network at sa aking mga kasamang direktor ng bawat diyosesis para sa social action centers nila, ang aking paanyaya, magandang tingnan natin sa pagkakataong ito ang usapin ng stunting, ito ay isang usapin na kailangan nating tingnan at magandang makita natin ito sa liwanag ng turo ng simbahan at kung paano tayo ay makakatugon sa kaniya-kaniya nating sitwasyon,” ayon sa panayam ng Radyo Veritas kay Father Siapco.
Nawa, panalangin ng Pari na sa tulong ng mga DSACs at pagtutulungan nila ay matulungan ang mga bata na makamit ang mga sapat na nutrisyon at mabawasan o tuluyang maiwaksi sa lipunan ang education poverty o pagkamang-mang sa mga batang mag-aaral.
Tiniyak din ni Father Siapco ang paghahanda ng LASAC sa nalalapit na ika-siyam na pagdiriwang ng World Day of the Poor kung saan sa Archdiocese of Lipa ay higit na paiigtingin ang palalawigin ang pagtugon sa dalawang suliranin para sa mga kabataan.
“Mayroong mga datos o research na pinalabas na, at ito ay pwedeng maibahagi sa atin, baka magandang makita natin sa ating mga sariling diyosesis, tayo ba ay gaano yung- percentage na effect nito sa atin at depende sa pagtaas ng porsyento ng effect, baka kailangan mas mataas din yung pagkilos natin para sa dito, ito ay isang paanyaya sa inyo mula sa inyong Social Action Network Representative at bilang kapatid ninyo sa paglilingkod sa larangan ng social action,” bahagi pa ng panayam ng Radyo Veritas kay Fr.Siapco.
Sa nakalipas na linggo ay umapela sa pamahalaan ang Catholic Bishops’ Conference of the Philippine na tugunan ang suliranin ng malnutrisyon at stunting na idinudulot nito sa mga bata o pagkabansot na hindi normal na paglaki matapos maranasan ang matinding gutom at kakulangan ng nutrisyon sa kanilang paglaki.
