625 total reads
Nilinaw ni Taytay, Palawan Bishop Broderick Pabillo na hindi sa kanya nagmula ang mga kumakalat sa social media hinggil sa usapin ng korapsyon sa pamahalaan habang umiiral ang pangkalusugang krisis sa lipunan.
Tinutukoy ng Obispo ang pahayag na may titulong “The Facemask: Symbol of corruption; downfall of Duterte” tungkol sa kontratang iginawad ng Administrasyong Duterte para sa kumpanyang Pharmally Pharmaceutical upang bumili ng mga overpriced protective gears tulad ng face masks at face shields na nagkakahalaga ng mahigit sa P8-bilyon.
Sinabi ni Bishop Pabillo na bagamat hindi sa kanya nagmula ang pahayag sang-ayon ito sa nais nitong iparating na mensahe sa publiko.
“May pinapaikot na ako sa viber na hindi ako ang sumulat ng article na iyon pero sumasang-ayon ako sa nilalaman niya,” pahayag ni Bishop Pabillo sa panayam ng Radio Veritas.
Samantala, nabanggit din sa kumakalat na pahayag na ang ma-anomalyang transaksyon ng pamahalaan ay nagpapatunay lamang na isinasawalang bahala nito ang kapakanan ng mamamayang lubos nang naghihirap at nagdurusa dahil sa epekto ng coronavirus pandemic.
Dagdag pa rito na maaaring ginagamit na lamang ng kasalukuyang administrasyon ang kalagayan ng bansa ngayong pandemya upang manatili sa kapangyarihan.
“They literally made a killing out of this corrupt transaction. While Filipinos are dying and more are getting sick, Duterte and his cohorts are laughing themselves all the way to possibly staying in power beyond 2022 with a huge election money to be able to buy the votes of the poor and suffering Filipinos,” bahagi ng pahayag.
Batay sa isinasagawang pagdinig ng Senado kaugnay sa pagbili ng Department of Health sa pamamagitan ng Department of Budget and Management-Procurement Service ng overpriced na face masks at face shields, lumabas ang pangalan ng ilang personalidad na sinasabing kaibigan ni Pangulong Rodrigo Duterte.
Kinilala ito na sina Michael Yang, dating economic adviser ng pangulo, at Lloyd Christopher Lao na dati namang undersecretary ng DBM-PS na parehong may kaugnayan sa Pharmally Pharmaceutical Corporation.
Ipinagtanggol ni Pangulong Duterte ang kanyang mga kaibigang sinasabing sangkot sa pagbili ng mga overpriced na face masks at face shields, ngunit sinabi rin ng pangulo na kapag napatunayang may ginawang mali sina Yang at Lao, dapat lamang itong papanagutin.
Patuloy namang naninindigan ang Simbahang Katolika na mahalaga ang pagiging mapagmatyag ng publiko upang matiyak na wasto at naaangkop ang mga desisyon at pagkilos ng pamahalaan para sa kapakanan ng mamamayan.
