663 total reads
Pinuri at pinasalamatan ng head chaplain ng Philippine General Hospital ang mga frontliners na nagpakita ng katapatan at katapangan sa naganap na sunog sa ospital noong Mayo 16.
Ayon kay Jesuit Priest Fr. Marlito Ocon, ipinakita ng mga healthworkers ang kanilang kabayanihang nagpapatunay na sila’y handang tumupad sa kanilang tungkuling alagaan at iligtas ang lahat ng apektadong pasyente.
“All of them at NICU [Neonatal Intensive Care Unit], I think have done their role and their part… Call it adrenaline rush, or simply call of duty, for me it’s HEROIC,” hango sa facebook post ni Fr. Ocon.
Pagbabahagi ni Fr. Ocon na hindi naging madali ang pag-evacuate sa mga pasyente dahil karamihan dito’y 35 bagong silang na mga sanggol kung saan 27 rito ay nasa kritikal na kondisyon at mayroong life support.
Ngunit sa ipinakitang pagkilos at pagtutulungan ng mga healthworkers ay matagumpay nilang nailikas sa PGH Chapel ang lahat ng sanggol.
“And one thing is [for] sure, they pushed and shattered their limits to save lives. Bravo to all of you, Nurses, Doctors, NAs, Utility Workers, Security Guards, Police and Firemen. You all have done your part the best you can. Thanks for saving all the angels entrusted to you,” saad ng pari.
Noong naganap ang sunog, agad na binuksan ng PGH Chaplaincy ang chapel nito upang maging pansamantalang masisilungan ng mga inilikas na pedia patients at mga bagong silang na sanggol.
Sa kasalukuyan ay sinisikap na maibalik agad sa normal ang operasyon ng PGH bagamat may mga lugar na sumasailalim pa rin sa clearing at pagkukumpuni.
Samantala, ayon kay Fr. Ocon, mas lalong lumawak ang tinutulungan ng chaplaincy kaugnay ng naganap na insidente, dahil umabot na sa humigit-kumulang 600 pasyente na kinabibilangan ng mga manggagawa, security at utility personnel ang kasalukuyang kinakalinga sa 16 na ward ng ospital.
Bukas naman ang Chaplaincy para tumanggap ng anumang uri ng tulong na nais ibahagi sa mga higit na apekyadong pasyente at ilang kawani ng ospital. Pangunahing pangangailangan pa rin ngayon ng mga pasyente ang mga basic needs tulad ng pagkain at tubig, maging ang diaper at wipes para naman sa mga bata.
