27,701 total views
Ilulunsad ng Catholic prayer app na Hallow ang global lenten prayer movement na Pray40: The Return.
Ayon kay Bernz Caasi, Hallow PH Team Lead, layunin ng inisyatibo na samahan ang mga mananampalataya sa paglalakbay ngayong kuwaresma sa pamamagitan ng mga pagninilay at mga panalangin gamit ang teknolohiya.
“Centered on the theme of coming home, Pray40 is designed to accompany those who may feel tired, distant, or uncertain in their faith,” ayon kay Caasi.
Nilalaman nito ang mga panalangin, pagninilay, fasting challenges, gayundin ang Sunday homilies.
Tampok sa global movement ang dalawang Pilipinong digital missionaies na sina Fr. Fiel Pareja at Fr. Joseph Franz Dizon.
Ibinahagi ni Caasi na itatampok din sa Pray40 ang tradisyon ng mga Pilipino sa panahon ng kuwaresma upang ibahagi ang mayamang tradisyon at kultura ng mga Pinoy Catholics.
“Pray40 also highlights Filipino devotional heritage, including reflections on the Pabasa ng Pasyon, offering users a distinctly local expression of Lenten prayer within a global faith community,” ani Caasi.
Sa pahayag ni Fr. Dizon maitururing na biyaya ang Hallow App sapagkat mas nagiging accessible sa publiko ang mga gawaing paghahanda sa Paschal Triduum at matulungan ang mananampalataya sa paglalakbay ngayong mga mahalagang yugto sa buhay ng mga kristiyano.
“Sa panahong hinahati tayo ng individualism, ang pabasa ay nagtitipon ng ating mga tinig—bilang pamilya at komunidad ng pananampalataya—upang sabay-sabay pagnilayan at ipahayag ang Pasyong Mahal ng ating Panginoon,” ayon kay Fr. Dizon.
Bukod kay Fr. Pareja at Fr. Dizon kasama rin sa Pray40: The Return, ang kilalang actor na si Jonathan Roumie (known for his portrayal of Jesus in The Chosen), Fr. Mike Schmitz, Sr. Miriam James Heidland,at iba pang personalidad.
Tampok sa fasting challenge ang mga pagninilay ng mga kilalang personalidad kabilang sina Mark Wahlberg, Chris Pratt, Gwen Stefani, kasama ang mga pari, madre at lay leaders sa iba’t ibang bahagi ng mundo.
Ang Hallow App ay may mahigit 30 milyong subscribers sa buong mundo kabilang na ang dalawang milyong Pilipino.
