153,411 total views
Mga Kapanalig, kasing-init din ba ng panahon ang inyong ulo nang makita ang inyong bill sa kuryente?
Dito sa Metro Manila at mga karatig probinsya na sineserbisyuhan ng Meralco, maraming konsumer ang nabulagâ sa mataas na singil sa kuryente nitong Abril. “Bill shock,” ‘ika nga. Inaasahan naman na ang paglaki ng konsumo ngayong tag-init dahil mas matagal na nakabukás ang mga electric fan at aircon. Pero may mga konsumer na nagsabing ganito rin naman ang konsumo nila ng kuryente noong isang taon, pero sadyang malaki ang singil sa kanila sa parehong panahon ngayong taon.
Paliwanag naman ng Meralco, ang pagtaas ng bill ngayong buwan ay dulot ng mas mataas na generation charge. Ang generation charge ay ang binabayaran natin para sa aktwal na produksyon ng kuryente at ang halaga ng pagbili ng mga power distributors, katulad ng Meralco, mula sa mga power generators. May epekto rin ang paghina ng piso laban sa dolyar. Dagdag pa ng Meralco, hindi pa sinasalamin ng pagtaas ng singil sa kuryente ang nagpapatuloy na krisis sa langis dahil na rin sa sigalot sa Middle East. Ibig sabihin ba nito, mas tataas pa ang singil ngayong Mayo?
Para sa Center for Energy, Ecology, and Development (o CEED), nakaugat ang problemang ito sa mga patakarang ipinapasa ang dagdag-gastos ng mga power generators sa mga ordinaryong konsumer. Matatagpuan ito sa mga tinatawag na pass-through provisions sa mga power agreements o kasunduan ng mga korporasyon sa gobyerno. Halimbawa, kung tataas ang presyo ng panggatong na ginagamit para lumikha ng kuryente, hindi ito ituturing ng mga kompanya na risk o panganib na dapat nilang paghandaan bilang mga negosyo. Sa halip, ipapasa nila ito sa mga konsumer. Nananatili ang kita ng mga korporasyon habang butás naman ang bulsa ng mga nakadepende sa kuryenteng nililikha at ibinebenta nila.
Makatarungan ba ito sa inyong tingin, mga Kapanalig?
Paglilinaw naman ng Meralco, wala itong magagawa sa mga dagdag-singil sa kuryente. Tagakolekta lang daw ito ng mga bayaring ipinapataw ng gobyerno at ng mga pass-through costs. Hindi nga raw ito nagtataas ng singil para sa distribution nito ng kuryente mula pa noong 2022. Ang mga nakokolekta ng Meralco dahil sa mga pass-through provisions na ito ay ibinabayad naman daw sa mga power suppliers, mga grid operators, at sa gobyerno bilang buwis. Hindi raw kumikita ang Meralco sa mga ito, pero hindi rin naman sinasabi ng kompanya kung patas ang mga pass-through costs. Tila inihihiwalay ng Meralco ang sarili nito sa responsabilidad para sa mataas na bill sa kuryente.
Matagal nang binubusisi ng mga grupong katulad ng CEED ang mga patakaran sa sektor ng enerhiya na mas pinapaboran ang mga korporasyon kaysa sa mga konsumer. Giit nila, kumikita ang mga kompanya sa pagnenegosyo ng kuryente, pero kapag panahon ng krisis, sa mga konsumer nila ipinapasa ang pasanin ng dagdag-gastos. Bagamat itinatakda ng batas ang mga pass-through provisions, hindi ibig sabihin na makatarungan ang mga ito. Parang ganito ang ipinahihiwatig sa 1 Corinto 10:23: malaya tayong gawin ang anuman at gawin itong ligal, pero hindi lahat ay nakabubuti, hindi lahat ay nakatutulong.
Sinasabi rin sa mga panlipunang turo ng ating Simbahan na ang mga batas ng tao ay dapat na nakatuon sa pagsusulong ng tunay na mabuti. Kung negatibo ang dulot ng isang batas, dapat lang na kuwestyunin ito. Hindi natin maaasahan ang mga kompanyang tanging ang pagkita ang prayoridad na manguna sa pagtatanggol sa mga konsumer.
Mga Kapanalig, hawak natin ang bill, pero hawak din natin ang kapangyarihang magtanong, mag-usisa, at humingi ng paliwanag sa gobyerno at mga kumikita sa serbisyong dapat lamang nating makamit bilang mga mamamayan.
Sumainyo ang katotohanan!
