9,280 total views
Ito ang pahayag ng Living Laudato Si’ Philippines hinggil sa insidente sa ginanap na Salubong noong Linggo ng Pagkabuhay sa Diocesan Shrine and Parish of the Immaculate Concepcion sa Malabon, kung saan isang kalapati ang itinali sa isang patpat at ikinabit pa sa mga lobo bago pinalipad.
Ayon sa grupo, nakalulungkot na ang kalapati—na sumasagisag sa Espiritu Santo at kapayapaan—ay ginamit bilang mekanismo sa ritwal at naging sanhi ng pagdurusa sa ibon.
“Ang isang simbolo ng buhay ay hindi maaaring iugnay sa gawain na nagdudulot ng kalupitan at kamatayan. Ito ay taliwas sa diwa ng Pasko ng Pagkabuhay—ang tagumpay ng buhay laban sa kamatayan,” ayon sa LLS Philippines.
Binanggit din ng LLS Philippines ang paalala ni Pope Francis sa kanyang ensiklikal na Laudato Si’ na taliwas sa dignidad ng tao ang magdulot ng pagdurusa o kamatayan sa mga hayop nang hindi kinakailangan.
Iginiit ng grupo na malinaw na walang puwang ang kalupitan sa hayop sa anumang gawaing panrelihiyon, sa halip, ang pananampalataya ay dapat magpalalim ng malasakit, hindi magbigay-daan sa pananakit.
Nananawagan ang grupo sa mga pinuno ng Simbahan, parokya, at mga mananampalataya na magsagawa ng masusing pagsusuri sa mga gawaing panrelihiyon, iwanan ang mga nakapipinsalang tradisyon, at yakapin ang mga paraang nagbibigay-buhay at sumasalamin sa awa at malasakit sa sangnilikha.
“Ang Pasko ng Pagkabuhay ay paanyaya sa panibagong buhay, hindi lamang sa ritwal kundi sa ating puso. Kung tunay na nabuhay si Kristo, itaguyod natin ang buhay sa lahat ng anyo nito,” saad ng LLS Philippines.
