574 total views
Kinakailangang mahuli at mapanagot ng mga otoridad ang utak o ang mastermind sa pagpaslang kay Rev. Fr. Richmond Nilo ng Diocese of Cabanatuan, Nueva Ecija.
Ito ang binigyang diin ni Manila Auxiliary Bishop Broderick Pabillo – Chairman ng CBCP Episcopal Commission on the Laity kasunod ng pagkakahuli ng mga otoridad kay Omar Mallari na umamin sa krimen ng pagpatay kay Fr. Nilo.
Giit ni Bishop Pabillo, hindi sapat na mahuli ang binayarang hitman ng Pari sa halip ay dapat na mahuli at mapanagot ang mastermind upang mabigyang katarungan ang krimen.
“Titingnan natin na talagang mahanap yung mastermind at yung dahilan ng pagpatay sa kanya upang panagutin ang mga taong nagbayad. Mahalaga dito hindi lamang yung binayaran yung nagbayad na siya ay mapatay kaya sana ay ito’y makuha ng mga pulis at managot sa kanyang kasamaang ginawa…” pahayag ni Bishop Pabillo sa panayam sa Radyo Veritas.
Nahuli si Omar Mallari noong Biyernes ika-29 ng Hunyo sa Barangay Arenas, Arayat, Pampanga na naglahad pa ng ibang pangalan na may kaugnayan sa pagpaslang kay Fr. Richmond Nilo.
Nauna namang nagpaabot ng pasasalamat ang Diocese of Cabanatuan sa patuloy na isinasagawang imbestigasyon ng Philippine National Police upang tuluyang mabigyan ng katarungan ang marahas na pagkamatay ng Pari.
Sa tala, si Fr. Nilo na ang ikatlong pari na napaslang sa loob lamang ng nakalipas na 6 na buwan.
Ang una ay si Fr. Marcelito “Tito” Paez ng Diocese of San Jose, Nueva Ecija noong ika-4 ng Disyembre ng nakalipas ng taong 2017 na nasundang ng pagpaslang kay Rev. Fr. Mark Anthony Ventura ng Archdiocese of Tuguegarao noong ika-29 naman ng Abril ng kasalukuyang taon.
